வருங்கால முதல்வரே வருக!

யாரப்பா அந்த புதிய வரவு என்று கலங்க வேண்டாம். எல்லாம் நம்ம நாட்டாமை அய்யாதான். நாட்டாமை அண்ணாச்சி என்ன சொல்றாருன்னு பார்ப்போமா?:

“விரைவில் நான் தொடங்க உள்ள புதிய கட்சியின் கொள்கைகளை வகுக்க ஓய்வு பெற்ற 30 ஐஏஎஸ் அதிகாரிகளைக் கொண்ட குழுவை அமைத்துள்ளேன்.

நாட்டின் பொருளாதாரம், தொழில், கல்வி உள்ளிட்ட பல்வேறு துறைகளின் வளர்ச்சிக்காக தொலைநோக்குடன் கூடிய கொள்கைகள் வகுக்கப்படும்.

எனினும், மக்களிடையே அரசியல் விழிப்புணர்வை ஏற்படுத்துவதே கட்சியின் முதலாவது கொள்கையாக இருக்கும்.

எனக்கோ அல்லது எனது சகாக்களுக்கோ தமிழகத்தின் முதல்வராக ஆசை இல்லை. ஆனால், நீங்களும் (மக்களும்) முதல்வராக வரலாம் என்று உணரச் செய்ய பாடுபடுவேன்.

தேர்தலின்போது சராசரியாக 55 சதவீதம் பேர் மட்டுமே வாக்களிக்கின்றனர். இதில் 28 சதவீதம் வாக்குகளை பெறுபவர்களே ஆட்சிப் பொறுப்புக்கு வருகின்றனர்.

எனவே, மீதியுள்ள வாக்காளர்களையும் வாக்களிக்கச் செய்வதன் மூலம் உண்மையான ஜனநாயகத்தை மலரச் செய்ய முடியும்.

காங்கிரஸ், திமுக, அதிமுக உள்ளிட்ட எந்தக் கட்சியை மக்கள் விரும்புகிறார்களோ அந்தக் கட்சிக்கு தங்களது வாக்குரிமையை முழுமையாக பயன்படுத்துவது அவசியம்.

அரசியல் தலைவர்கள் தற்போது கொச்சையாக விமர்சனம் செய்கின்றனர். யார் குடிகாரர் என்று தினமும் வாக்குவாதம் நடப்பது வேதனை அளிக்கிறது.

இளைஞர்கள் நல்லொழுக்கத்தை பின்பற்றினால் பல ஆண்டுகள் இளமையுடன் வாழலாம். எம்.ஜி.ஆர். தனது 65 வயதில் கூட துள்ளிக் குதித்து ஓடியதை நான் பார்த்து வியந்துள்ளேன்.

25 ஆண்டுகள் திரைப்படத் துறையில் தொடர்புள்ள நான் அரசியலுக்கு வர எம்ஜிஆர் தான் காரணம். எம்.ஜி.ஆர். தான் எனக்கு முன்மாதிரி.

“நாட்டாமை” போல யாருக்கும் பஞ்சாயத்து செய்ய மாணவர்கள் நினைக்க வேண்டாம்.

மக்களின் அடிப்படைப் பிரச்சினைகளை தீர்க்க பாடுபடுவேன். அதற்காகவே அரசியலுக்கு வந்துள்ளேன். ஆனால், ஒரு நாள் முதல்வராக இருந்து ஒன்றும் சாதிக்க முடியாது.

2 கட்சிகள் உள்ள ஜனநாயக முறை நமக்குப் பொருந்துமா என்பதை மக்கள்தான் முடிவு செய்ய வேண்டும்.”

நம்ம அண்ணாச்சியின் அறிக்கையினைகண்டு புல்லரித்துப் போய் இருப்பவர்களுக்கு -பொறுங்கள். ஏழரை அண்ணாச்சிக்கா அல்லது தமிழக அப்பாவிஜனங்களுக்கா என்பதை பொறுத்தி்ருந்து பார்ப்போம்.

செய்திகள், தமிழகம் இல் பதிவிடப்பட்டது . 3 Comments »

கலைஞர் கருணாநிதியும் நானும்.

கலைஞர் : பிறந்த நாள் விழா கொண்டாடப்படுவது மகிழ்விப்பதற்காக அல்ல.

நான் : அப்படியா? வேறு எதற்காகவாம்?

கலைஞர் : ஒருவர் கொண்ட கொள்கையை பின்பற்றி நடப்பதற்காகவும் தான்.

நான் : அட இது தெரியாமல் போயிற்றே. இது நமது புது தத்துவமா?

கலைஞர் : நாம் ஏற்கனவே உள்ள தத்துவத்தை முடித்து விட்டு தான் புதிய தத்துவத்திற்குள் நுழைய வேண்டும்.

நான் : அப்படியெனில் புதிய தத்துவம் எப்பொழுது கிடைக்கும்?

கலைஞர் : ஏற்கனவே, உள்ள தத்துவத்தை நிறைவேற்றும் பணிகளை முடியுங்கள். புதிய தத்துவத்தை தருகிறோம்.

நான் : ஏற்கனவே, உள்ள தத்துவத்தை நிறைவேற்ற நாங்கள் என்ன செய்ய வேண்டும்?

கலைஞர் : ஏற்கனவே, உள்ள தத்துவத்தை நிறைவேற்ற, மக்களிடத்தில் நம் கொள்கைகளை இன்னும் ஆழமாக கொண்டு செல்ல வேண்டும்.

நான் : சரி. அப்படியே செய்கிறோம். ஆனால் ஒரு சந்தேகம். நமக்கென அப்படி ஏதாவது தனியாக கொள்கைகள் இருக்கின்றதா என்ன? ஒரு உதாரணம் கூறுங்களேன்.

கலைஞர் : தமிழகத்தில் பிற்படுத்தப்பட்ட மற்றும் மிகவும் பிற்படுத்தப்பட்ட மக்களுக்கு கல்வி மற்றும் வேலைவாய்ப்பில் இடஒதுக்கீடு உருவாக்கிட பாடுபட்டோம்.

நான் : அப்படியா? ஆச்சரியமாக உள்ளது! இந்த வெட்டிவேலையை நாம் எப்பொழுது செய்தோம்?

கலைஞர் : நீதிக்கட்சியாக இருந்த போதும் அதுமாறி பின்னர் திராவிடக் கட்சியாக உருவாகிய போதும் இக்கொள்கைகளை பரவலாக்கி இன்னும் பாடுபட்டுக் கொண்டிருக்கிறோம்.

நான் : (மனதினுள் – அது தான் மத்தியிலும் மாநிலத்திலும் குடும்பத்தினர்களை நுழைக்க அல்லும்பகலும் பாடுபட்டு கொண்டிருப்பது தெரிகிறதே!) ஓ! ஆமாம், ஆமாம். மறந்தே போய் விட்டது!

கலைஞர் : பிறந்தநாள் செய்தியாக நான் மத்திய அரசின் ஆட்சி மொழிகளில் ஒன்றாக தமிழ் வரவேண்டும் என்று கூறியுள்ளேன்.

நான் : பேஷ் பேஷ். ஆஹா! அப்படித்தான் பிரம்மாதம். மத்திய அரசை கதிகலங்க அடித்து விட்டீர்கள் தலைவா!(மனதினுள் – ஆமாம், இப்படியே காலத்தை ஓட்டி விடும். பின்னர் இளைய வாரிசு முன்னெடுத்து செல்லும். அப்படியே இன்னும் ஒரு 100 வருடம் ஓட்டி விடலாம். அடுத்த ஒரு 100 வருடத்திற்கு தமிழன்களை முன்னேற விடுவதாக உத்தேசமே இல்லை போலிருக்கிறது. விளங்கியது போல் தான்.)

கலைஞர் : மேலும், இந்திய நதிகளை ஒன்றிணைக்க வேண்டும்.

நான் : அது நடக்குமா தலைவா?கங்கைகாவிரியில் இணையும் முன் இணைக்க கூறுபவர்கள் இந்தியாவை விற்று விடுவார்களே!( மனதினுள் – ஓ! அவசரப்பட்டு வார்த்தையை விட்டு விட்டேனே. கடவுளே நான் கூறியதை இவர் புரிந்து கொள்ளாமல் இருக்க வேண்டுமே!)

கலைஞர் : கங்கையையும் காவிரியையும் இணைப்பது என்பது கடினம் தான். முதலில் தீபகற்ப நதிகளையாவது ஒன்றிணைக்க வேண்டும். கோதாவரி கங்கை, கோதாவரி காவிரி நதிகளை ஒன்றிணைக்க வேண்டும்.

நான் : (மனதினுள் – அப்படி போடு.நம்மிடமே இப்படி இரட்டைநாக்குடன்பேசுபவர்மக்களிடம் எப்படியெல்லாம் பேசுவார்! யப்பாஆ ஜகஜால கில்லாடி தான் டோய். எப்படியோ நான் சொன்னதை புரிந்து கொள்ளவில்லை. தப்பித்தேன்.) தலைவா, அதுகூட நடக்குமா?(இதுக்காவது ஒழுங்கா ஏதாவது ஐடியா வைத்திருப்பாரா?)

கலைஞர் : மாநிலங்களுக்கு இடையில் உள்ள நதிகளை ஒன்றிணைக்க வேண்டும்.

நான் : (என்ன இது? இப்படி ப்ளேட்டை மாத்தி போடுறார்?) தலையை சொறிந்து கொண்டே… தலைவா, இதாவது நடக்குமா?

கலைஞர் : தென்னக நதிகளையாவது இணைக்க வேண்டும்.

நான் : (யப்போய். தல சுத்துதே!)

கலைஞர் : (என் நிலையை கண்டு கொள்ளாமல் தொடர்கிறார்) இதற்காக மாநாடுகளை போட்டு அதில், மாநில நீர்பாசனத் துறை அமைச்சர்கள் மற்றும் முதல்வர்களை மற்றும் பிரதமரை அழைத்து ஒப்பந்தம் ஏற்படுத்த வேண்டும்.

நான் : (யார் அழைப்பதாம். நடக்காது என்பதை சூசகமாக தெரிவிக்கிறாரோ?) இவ்வளவு கஷ்டப்பட்டு இதெல்லாம் எதற்காக தலைவா?

கலைஞர் : அப்போதுதான் நாட்டின் வளம் பெருகும்.

நான் : (ஆகா! நாட்டின் வளத்தை விட குடும்ப வளத்தை பெருக்குவது தான் தன் உத்தேசம் என்பதை எவ்வளவு தெளிவாக கூறுகிறார்.)

கலைஞர் : எல்லா மாநிலங்களும் பயன் பெறும். அதற்கு ஆவண செய்ய வேண்டும்.

நான் : (யார்? பிரதமரையும் அழைத்து ஒப்பந்தம் போட இவர் யாரிடம் தான் கோரிக்கை வைக்கிறார்? ஒரு மண்ணும் புரியலப்பா.) சூப்பர் தலைவா. நம்மோட பழைய கொள்கைகள்ல மேலும் ஒண்ணு கூட சொல்லுங்களேன்.

கலைஞர் : கொள்கைஅளவில் ஆந்திரா, வங்காளம் மற்றும் தமிழக அரசுகள் மதச்சார்பற்ற அரசுகளாக இருக்க வேண்டும்.

நான் : அது என்ன இந்த மூன்று மாநிலத்தை மட்டும் குறிப்பிட்டு கூறுகின்றீர்கள்? அப்படீன்னா மற்ற மாநிலங்களும், மத்தியிலும் மதசார்புள்ள அரசு அமையலாமா?

கலைஞர் : மத்தியிலும் மாநிலங்களிலும் மதச்சார்பற்ற அரசு அமைய வேண்டும்.

நான் : (வயசாயிட்டாலே இப்படித்தானோ? மனுசன் இப்படி நிமிட நேரத்துல நிறம் மாறுராரே!) அருமை தலைவா!

கலைஞர் : நாம் தான் மதச்சார்பற்ற அரசிற்கு அடிக்கல் நாட்டினோம்.

நான் : (நாட்டல, புடுங்கினீங்க. அண்ணாவின் பகுத்தறிவு பாசறைன்னு அடிக்கடி குரல் குடுத்துட்டு மனுசன் இப்படி கேப்புல மஞ்சத்துண்டு, அடிக்கலுன்னு பினாத்துறாரு. மஞ்சத்துண்டு, அடிக்கல் எல்லாம் மதசார்பின்மையின் அடையாளமோ?) ஆமாம் தலைவா!

கலைஞர் : நம்மால் வளர்க்கப்பட்ட இயக்கம் பெற்றுள்ள வலிமையான இளைஞர் பட்டாளத்தை கொள்கைகளை ஏற்றுக்கொள்ள அடித்தளத்தை ஏற்படுத்த வேண்டும்.

நான் : (அப்பாடா. முதன்முதலா ஒரு உண்மையை போட்டு ஒடச்சிட்டார். ஆமா, கொள்கைன்னா என்னன்னே தெரியாம இருக்குற உடன்பிறப்புகளுக்கு இடையில், இப்படி நிமிட நேரத்தில் மாற்றி மாற்றி பேசிக் கொண்டிருந்தால் எந்த உடன்பிறப்பு தான் கொள்கையை பற்றி கவலைப்படும்?) நம் இளைஞர் பட்டாளம் ஒரு சுத்தமான கொள்கை பட்டாளம் தலைவா. இது கொள்கைக்காகவே ஒன்று கூடிய பட்டாளம் தலைவா! நீங்க சொன்னா எல்லாம் சரியாத்தான் இருக்கும் தலைவா!

கலைஞர்: பழைய தத்துவத்திற்கு புதிய பலத்தை தரவேண்டும்.

நான் : (புரியலியே. ஒருவேளை கம்பு, தடி, அரிவாள்களை விட்டுவிட்டு துப்பாக்கி, குண்டு போன்றவற்றை கையில் எடுக்க வேண்டும் என்கிறாரோ?) கண்டிப்பாக தலைவா! நீங்கள் சொல்லுங்கள். நாங்கள் செய்கின்றோம்.

கலைஞர் : வாய்மை, தூய்மை இரண்டையும் முக்கிய கொள்கையாக நீங்கள் கடைப்பிடிக்க வேண்டும்.

நான் : (ஆமா, கொள்கைகளை கடைபிடிக்க கூறும் பொழுது “நாம்” என அனைத்திற்கும் கூறிவிட்டு, இந்த இடத்தில் மட்டும் கவனமாக “நீங்கள்” என குறிப்பிடுகிறார். பழம் தின்னு கொட்டைப் போட்டவர் என்பது எவ்வளவு சரியானது!) அப்படியே ஆகட்டும் தலைவா!

கலைஞர் : அரசியலில் நாம் ஆற்றும் பணிகளை மற்றும் ஓராண்டு சாதனைகளை மக்களிடம் எடுத்துக் கூற வேண்டும்.

நான் : (கனிமொழியை டெல்லிக்கு அனுப்பியது, மதுரைக்கு தெற்கே அழகிரிக்கும் வடக்கே ஸ்டாலினுக்கும் எழுதிக் கொடுத்துள்ளது, கள்ள ரயில் ஏறி சென்னை வந்தவர் இன்று ஆசியாவிலேயே இரண்டாவது பணக்காரராக ஆனது எப்படி என்பது போன்றவற்றையும் மக்களிடம் எடுத்துக் கூறவா?)இலவச டிவி, அரிசி, வேட்டி, சேலை எல்லாத்தையும் நிச்சயமா எடுத்துச் சொல்றோம் தலைவா.

கலைஞர் : இந்தியாவை வலிமைப்படுத்தும் திட்டமாக சேது சமுத்திர திட்டம் உள்ளது. இந்த திட்டத்தை தடுக்க மதவாத சக்திகள் முயற்சி செய்து வருகின்றன.

நான் : (மதவாத்தின் வரையறை என்ன? குல்லாய் போட்டவர்களின் நண்பன், மஞ்சள் துண்டு, அடிக்கல் இதெல்லாம் மதசார்பின் அடையாளங்கள் இல்லையா?) ஆமாம் தலைவா!

கலைஞர் : ராமர் கோவிலுக்காக பாபர் மசூதியை இடித்தவர்கள், இன்று சேது சமுத்திர திட்டத்தை எதிர்க்கின்றனர்.

நான் : (ஸ்டாலினுக்காக அழகிரியையும், கனிமொழிக்காக தயாநிதியையும், குடும்பத்திற்காக கட்சியையும், ஆட்சிக்காக கொள்கையையும் இடித்து தரைமட்டம் ஆக்கியதை விடவா?) அவர்களுக்கு எதிராக போராடுவோம் தலைவா.

கலைஞர் : இத்திட்டம் நிறுத்தப்படடால் இந்தியாவின் வடபகுதி வாழும்.தென்பகுதி தேயும் நிலை ஏற்படும்.

நான் : (ஓ சங்கதி அப்படிப்போகுதா? சரி அப்படியாவது சிங்கிள் டீக்கு லாட்டரி அடித்து, கள்ள ரயில் ஏறி சென்னை ப்ளாட்பாரத்தில் அலைந்து திரிந்த ஆசியாவின் இரண்டாவது பணக்காரர் தேய்கிறாரான்னு பாக்கலாமே) ஆம். இது தமிழையும் தமிழ்நாட்டை அழிக்க வடமொழியினர் செய்யும் சதி தான் தலைவா.

கலைஞர் : திட்டம் நிறைவேற்றப்பட்டால் தென்பகுதி மிகச் சிறந்த வளர்ச்சி நிலைக்கு மாறும்.

நான் : (அது மாறுகிறதோ என்னமோ, ஆசியாவின் டாப் 10 ல் முதலிடத்திற்கு இவர் மாறிவிடுவார்.) அதன்மூலம் தமிழை உலகெங்கும் பரப்பலாம்.

கலைஞர் : பல நன்மைகளை பெறும்.

நான் : (யார்? புரியுது) எனவே தமிழ் வாழ்க!

கலைஞர் : இத்திட்டத்தை எதிர்க்கும் மதவாத சக்திகளுக்கு பாடம் புகட்ட வேண்டும்.

நான் : எனவே எல்லோரும் உதயசூரியன் சின்னத்தில் வாக்களியுங்கள். (ஆமா வேற என்ன சொல்லப்போறார்? தேவையெனில் அவர்கள் திருந்திவிட்டதாக கூறி கூட்டு வைக்கவும் தயங்கமாட்டாரே. நோக்கம் நாற்காலி மட்டும் தானே. ம் வாழுங்கள். ஆசியா டாப் 10 ஆக வாழ்த்துக்கள்)

கலைஞர் : மத்தியில் மதச்சார்பற்ற அரசு அமைய வேண்டும்.

நான் : (போட்டாரு பாரு போடு. இதுதான் ஹைலைட். எவ்வளவுதெளிவா இப்ப மத்தியில் ஆட்சியில் இருக்கிற காங்கிரஸ் தலைமையிலான கூட்டணி அரசு மதச்சார்பற்ற அரசு இல்லை என்று வாக்குமூலம் தருகிறார். சம்மதிக்க வேண்டும் அய்யா இவரின் தைரியத்தை.) ஆம். அதற்கு நாம் தற்போது போன்று நிபந்தனையற்ற ஆதரவு அளிப்போம்.

புரியாமல் தலையை பிய்ப்பவர்களுக்கு மட்டும்.

சிந்தனைகள் இல் பதிவிடப்பட்டது . Leave a Comment »

இந்தியாவில் தேவதாசி முறை தொடர்கிறது!

இந்தியாவில் பெண்கள் மத ரீதியாக பாலியல் அடிமைகளாக வாழ நிர்ப்பந்திக்கப்படுவது இன்னமும் தொடர்கிறது என்று பிபிசி நடத்திய ஒரு புலனாய்வில் தெரியவந்துள்ளது.

இந்த வழக்கத்தை ஒழிப்பதற்காக சட்டங்கள் கொண்டு வரப்பட்டுள்ள போதிலும், பாரம்பரிய இந்துக் கலாச்சாரத்துடன் தொடர்புடைய இந்த வழமை இன்னமும் தொடரத்தான் செய்கிறது.

எல்லம்மா என்னும் பெண் தெய்வத்தை வழிபடும் முறைமை ஆயிரக்கணக்கான ஆண்டுகளாக அங்கு தொடருகிறது. அந்த பெண் தெய்வத்தை வழிபடுபவர்கள், தமது பெண் குழந்தைகளை அந்த தெய்வத்துக்கு சேவை செய்வதற்காக காணிக்கையாக்குகின்றனர்.

அந்தப் பெண்கள் தேவதாசிகள், அதாவது தெய்வத்தின் அடிமைகள் என்று அழைக்கப்படுவார்கள். ஆனால் தெய்வத்தின் அடிமைகளாக சித்தரிக்கப்படும் இந்த பெண்களில் பலரது வாழ்க்கை ஒட்டுமொத்தத்தில் பாலியல் அடிமைகளாகத்தான் சென்று முடிகிறது.

50 வருடங்களுக்கு முன்னர் இந்த தேவதாசி முறைமையைத் ஒழிக்கும் சட்டம் அமலுக்கு வந்திருக்கின்ற போதிலும், தேவதாசிகளாக பெண்கள் பொட்டுக்கட்டப்படுவது, பாலியல் அடிமைகளாக வாழ்க்கை தொடர்வதும் இன்னமும் தொடரத்தான் செய்கிறது. கர்நாடக மாநிலத்தில் மாத்திரம் சுமார் இருபத்தையாயிரம் தேவதாசிகள் இருப்பதாக இந்த முறைமைக்கு எதிரான செயற்பாட்டாளர்களால் கணிக்கப்பட்டுள்ளது.

படித்தது.

இந்தியா, செய்திகள் இல் பதிவிடப்பட்டது . 2 Comments »

எம்.எல்.ஏக்கள் நீக்கம் – பாஜக அதிரடி.

ராஜஸ்தானில் கட்சிக்கு விரோதமாக செயல்பட்டதாக எம்.எல்.ஏ.க்கள் இருவரை பாரதீய ஜனதா கட்சி இடைநீக்கம் செய்தது.

இதன்படி, ‘அட்டர் சிங் பாந்தா மற்றும் பிரஹலாத் குன்ஜால் ஆகியோர் கட்சியிலிருந்து தற்காலிகமாக நீக்கப்படுவதாகவும், ஒரு வார காலத்தில் அவர்கள் விளக்கம் அளிக்க வேண்டும் எனவும் அக்கட்சியின் செய்தித் தொடர்பாளர் ஷர்மா தெரிவித்தார்.

மேலும், அவ்வாறு விளக்கமளிக்கவில்லை என்றால், அவர்களை நீக்குவது குறித்து தலைமையிடத்தில் பரிந்துரைக்கப்படும் என்றும் அவர் கூறினார்.

குர்ஜார் விவகாரத்தில் மாநில முதல்வர் வசுந்தரா ராஜேவின் மோசமான செயல்பாட்டின் காரணமாக, அடுத்தத் தேர்தலில் கோட்காவில் உள்ள இரு தொகுதிகளில் அவருக்கு எதிராக இவ்விருவரும் செயல்பட திட்டமிட்டிருந்தனர். இதனை காரணம்காட்டி அவ்விருவரும் இடைநீக்கம் செய்யப்பட்டனர்.

மேலும், இந்த விவகாரம் தொடர்பாக மேலும் 20 எம்.எல்.ஏ.க்களுக்கு பாரதீய ஜனதா கட்சி எச்சரிக்கை விடுத்திருக்கின்றது.

இந்தியா, செய்திகள் இல் பதிவிடப்பட்டது . Leave a Comment »

மதரசாக்கள் அறிவு மையங்கள் – ராஜசேகர ரெட்டி.

ஐதராபாத்தில் மதரசாக்களுக்கு உருது அகாடமி சார்பில் கம்ப்யூட்டர் வழங்கும் விழா நடந்தது. இதில் கலந்து கொண்ட ஆந்திர முதல்வர் ராஜசேகர ரெட்டி பேசியதாவது:

“முஸ்லிம்களுக்கு இடஒதுக்கீடு வழங்க வேண்டும் என்பதில் அரசு உறுதியாக உள்ளது. இது தொடர்பாக எழுந்துள்ள சட்டப்பூர்வமான தடைகளை எதிர்கொண்டு, கல்வி மற்றும் வேலைவாய்ப்பில் முஸ்லிம்களுக்கு இடஒதுக்கீடு வழங்கும் வகையில் இன்னும் 30 நாட்களில் அவசரச் சட்டம் கொண்டுவரப்படும். சிறுபான்மையினர் நலனில் மாநில அரசு மிகவும் அக்கறை கொண்டுள்ளது. மதரசாக்களில் நவீன கல்வி கற்றுத்தர ஏற்பாடு செய்யப்படும்.”

“மத்தியில் தேசிய ஜனநாயகக் கூட்டணியும், மாநிலத்தில் தெலுங்கு தேசமும் ஆட்சி செய்தபோது, தீவிரவாத பயிற்சி முகாம்களாக மதரசாக்கள் சித்தரிக்கப்பட்டன. ஆனால், அவை அறிவு மையங்கள் என்று காங்கிரஸ் அரசு கருதுகிறது. மதரசாக்களை நவீனப்படுத்த அரசு எல்லா உதவிகளையும் செய்யும்”. இவ்வாறு ராஜசேகர ரெட்டி பேசினார்.

இந்தியா, செய்திகள் இல் பதிவிடப்பட்டது . Leave a Comment »

ராமர் பாலத்தால் சுற்றுச்சூழலுக்கு கேடு – சுப்ரமணிய சுவாமி வரவேற்பு!

ராமர் பாலத்தால் சுற்றுச்சூழலுக்கு பாதிப்பு ஏற்படுவது குறித்து உலக நினைவுச் சின்னங்கள் கண்ணாணிப்பு அமைப்பு கவலை வெளியிட்டுள்ளதற்கு ஜனதா கட்சித் தலைவர் சுப்பிரமணியன் சுவாமி வரவேற்பு தெரிவித்துள்ளார்.

இதுகுறித்து அவர் கூறியது:

“ராமர் பாலம் பழங்கால நினைவுச் சின்னங்களில் ஒன்றாக கருதப்படுகிறது. இந்த நினைவுச் சின்னம் குறித்து ஆவணங்களை திரட்ட அமெரிக்காவில் இருந்து இயங்கி வரும் உலக நினைவுச் சின்னங்கள் கண்காணிப்பு அமைப்பு முடிவு செய்துள்ளது.

ராமர் பாலம் எவ்வளவு காலத்துக்கு முற்பட்டது என்பதை அறிய அந்த அமைப்பு, ராமர் பாலப் பகுதியில் உள்ள துகள்களை மாதிரியாக கொண்டுச் சென்று ஆய்வு நடத்த உள்ளது.

முன்னதாக இந்த அமைப்பின் தலைவர் மர்லின் பெரி இந்திய அரசுக்கு எழுதியுள்ள கடிதத்தில், சர்வதேச கடல் ஆராய்ச்சி புகைப்படக்காரர்கள் உதவியுடன் இப் பாலத்தின் படம் எடுக்க அனுமதிக்க வேண்டும் என கோரியுள்ளார். மேலும், சுற்றுச்சூழலுக்கு இந்த பாலத்தால் கேடு விளையும் என்றும் மர்லின் கூறியிருப்பது வரவேற்கத்தக்கது” என்று குறிப்பிட்டுள்ளார்.

செய்திகள், தமிழகம் இல் பதிவிடப்பட்டது . Leave a Comment »

சாமியப் பத்தி பேசு! ஆனா, இரட்டை டம்ளர் பத்திப் பேசாதே!

சாதி இழிவுகளையும், தீண்டாமைக் கொடுமைகளையும் எதிர்க்கத் துணியும் எவருக்கும் இந்த சமூகம் அளிக்கும் ஒரே பரிசு அவமானமும், அடி உதையும் மட்டுமே. இச்சமூகத்தின் பிற கேடுகளை எதிர்க்கும் சமூகப் போராளிகள் சந்திக்க நேரிடும் அச்சுறுத்தல்களுக்கும் எதிர்ப்புகளுக்கும் நடுவே அவர்களுக்கு கிடைக்கும் குறைந்தபட்ச அங்கீகாரம்கூட, சாதி ஒழிப்புப் போராளிகளுக்கு கிடைப்பதில்லை. மனதையும் உடலையும் வருத்திக் கொள்வதிலேயே சாதி ஒழிப்புப் போராளிகளின் பயணம் நீடிக்கிறது. அதை விரும்பி ஏற்று, அயராது தொடர்பவர்களாலேயே சமூக விடுதலையும் சாத்தியமாகிறது. இதை மெய்ப்பிக்கும் வகையில் பெரியார் திராவிடர் கழகத் தோழர்கள் அண்மையில் கையிலெடுத்த ஒரு பிரச்சினை நமக்கு நம்பிக்கையளிப்பதாக இருக்கிறது.

திண்டுக்கல் மற்றும் பழனி மாவட்டங்களில் உள்ள கிராமங்களில் இன்று வரையிலும் தேநீர்க் கடைகளில் இரட்டைக் குவளை முறையும், இரட்டை இருக்கை முறையும் நிலவி வருகிறது. சாதி இந்துக்களுக்கு, கண்ணாடி குவளையிலும், தலித் மக்களுக்கு பிளாஸ்டிக் குவளையிலும் தேநீர் வழங்கப்படுகிறது. மேலும், தலித் மக்கள் அமர்வதற்கு சற்றே தாழ்ந்த பெஞ்சோ, சிமெண்ட் திண்ணை அல்லது தரையோதான் ஒதுக்கப்படுகிறது. இக்கொடுமைகளை எதிர்த்து, பெரியார் திராவிடர் கழகத்தினர் 11.4.2007 முதல் பிரச்சாரப் பயணத்தை மேற் கொண்டனர். இதனால் சாதி இந்து கவுண்டர்களால் மிரட்டி விரட்டப்பட்டுள்ளனர்.

“முதலில் இரட்டை டம்ளர் முறை ஒழிப்பு பற்றி மட்டுமே பிரச்சாரம் செய்யலாம் எனத் திட்டமிட்டிருந்தோம். அச்சமயத்தில் அதாவது பிப்ரவரியில் ஒட்டன்சத்திரம் அருகே பழையபட்டி என்ற கிராமத்தில் தலித் ஒருவருக்குச் சொந்தமான பூமிதான நிலத்தை, செட்டியார் சமூகத்தைச் சேர்ந்த ஒரு குழு கைப்பற்றி, நிலத்துக்குச் சொந்தக்காரரான தலித்தை தாக்கி நிலத்திலிருந்து விரட்டியது. ஆக்கிரமிப்பாளர்களுக்கு ஆதரவாக திண்டுக்கல் மாவட்டக் கலெக்டர் வாசுகி மற்றும் எஸ்.பி. பாரி ஆகியோர் இருந்தனர். தங்கவேல் என்ற அய்.ஏ.எஸ். அதிகாரியும் இதற்கு துணையாக இருந்தார். இந்தப் பிரச்சனையை கையிலெடுத்த தமிழக தலித் விடுதலை இயக்கம், பெரியார் திராவிடர் கழகத்தின் ஆதரவைக் கோரியது. அச்சமயத்தில் அப்பகுதியில் ஆக்கிரமிக்கப்பட்டிருக்கும் பஞ்சமி நிலங்கள் பற்றியும் அறிந்தோம். எனவே, இரண்டு பிரச்சனைகளையும் இணைத்துப் பிரச்சாரத்தைத் தொடங்க முடிவு செய்தோம்” என்கிறார், பெரியார் திராவிடர் கழக களப்பணி ஒருங்கிணைப்பாளர் தாமரைக் கண்ணன்.

ஏப்ரல் 11 அன்று திண்டுக்கல் மாவட்ட கிழக்கு எல்லையான குருவன் வலசில் இருந்து 20 தோழர்கள் ஒரு மினிடோரிலும், 4 இரு சக்கர வாகனங்களிலும் பயணத்தைத் தொடங்கினர். “இரட்டை டம்ளர் ஒழிப்பு பஞ்சமி நில மீட்பு இந்திய தேசிய பன்னாட்டுக் கூட்டுக்கொள்ளை எதிர்ப்புப் பயணம்’ என விளம்பரப் பதாகை பொருத்தப்பட்ட பிரச்சார வாகனத்திலேயே ஒலிபெருக்கி இணைக்கப்பட்டிருக்கும். ஒவ்வொரு ஊரிலும் மக்கள் அதிகம் கூடும் தேநீர்க் கடைகள் முன்பு முதலில் ஒரு பாடல் பாடி, பிறகு அரை மணிநேரம் அங்கு சாதி தீண்டாமைக் கொடுமைகளுக்கு எதிராக உரை நிகழ்த்தப்படும். அப்போதே துண்டறிக்கை விநியோகம் மற்றும் உண்டியல் வசூல் என்று பிரச்சாரம் நடைபெற்றுள்ளது.

“5 நாட்கள் நடந்த இப்பிரச்சாரத்தில், உண்டியல் வசூல் 4,600 ரூபாய் என்பது மக்களிடம் உள்ள வரவேற்பைக் காட்டியது. தாழ்த்தப்பட்ட மக்களிடம் நாங்கள் எதிர்பாராத ஆதரவு கிடைத்தது. ஒரே நாளில் 90 “தலித் முரசு’ இதழ்கள் விற்பனை ஆனது” என்கிறார் பெரியார் திராவிடர் கழகத் தோழர் ஜவகர்.

காவல் துறைக்கு தெரிவித்த ஊர்களைத் தவிர, இக்கொடுமை எங்கெங்கு உள்ளது என கேள்விப்பட்ட பெரும்பாலான ஊர்களுக்கும் பெரியார் திராவிடர் கழகத்தினர் சென்றுள்ளனர். குறிப்பாக, பழனி ஒன்றியத்தில் அவர்கள் பயணம் செய்த மிடாப்பாடி, மயிலாபுரம், நல்லெண்ணக் கவுண்டன் புதூர், பாப்பாகுளம், அய்யம்பாளையம், சின்னாக் கவுண்டன் புதூர், வேலாயுதம்பாளையம் புதூர், காவலப்பட்டி ஆகிய ஊர்களிலும், தொப்பம்பட்டி ஒன்றியத்தில் கோவில் அம்மாபட்டி, அத்திமரத்துவலசு, ராஜாம்பட்டி, பணம்பட்டி, அக்கரைப்பட்டி, சரவணப்பட்டி, ஆலாவலசு, புலாம்பட்டி, வாகரை, மரிச்சிலம்பு, போதுப்பட்டி, கொழுமங்கொண்டான், சங்கஞ்சட்டிவலசு, பெரியமொட்டனூத்து, தாளையுத்து, நாச்சியப்பன்கவுண்டன் வலசு ஆகிய ஊர்களில் இரட்டை பெஞ்ச் முறையும், இரட்டை டம்ளர் முறையும் உள்ளதை நேரில் பார்த்துள்ளனர்.

“முதலில் எதிர்ப்பு வரவில்லை. சேரிகளுக்குச் சென்று அங்குள்ள கொடுமைகள் பற்றி விசாரித்தோம். வேலாயுதம்பாளையம் புதூர் என்ற ஊரில் அப்படிப் பேசுவதைப் பார்த்த கவுண்டர்கள் சிலர், நாங்கள் கிளம்பியதும் தலித்துகளிடம் மிரட்டும் தொனியில் பேசியதைப் பார்த்தோம். எனவே, தலித்துகளிடம் வெளிப்படையாகப் பேசுவதைத் தவிர்த்தோம். முதல் நாள் அய்யம்பாளையம் என்ற ஊரில் ஆங்காங்கே தனியாக நின்றுகொண்டு கண்டபடி ஆபாசமாக சாதி இந்துக்கள் திட்டத் தொடங்கினர். பெரும்பாலும் அனைத்து வகையான கெட்டவார்த்தைகளையும், முறைப்புகளையும் கண்டோம்” என்கிறார் தாமரைக் கண்ணன்.

ஏப்ரல் 11 அன்று தொடங்கிய பயணம் பழனி மற்றும் தொப்பம்பட்டி ஒன்றியங்களில் உள்ள பல கிராமங்களைக் கடந்து ஏப்ரல் 15 அன்று மாலை 5 மணிக்கு திண்டுக் கல் மாவட்டம் தொப்பம்பட்டி ஒன்றியத்தைச் சேர்ந்த வாகரையை அடைந்தது. பிரச்சாரக் குழுவினர், ஒலிபெருக்கியில் துண்டறிக்கையை முதலில் வாசித்தனர். “நாங்க துண்டறிக்கையை வாசிக்கத் தொடங்கிய உடனே அவ்வூரைச் சேர்ந்த இளைஞர்கள் இருவர், பிரச்சாரக் குழுவைச் சேர்ந்த வழக்கறிஞர் செல்லத்துரையை அழைத்து “மரியாதையாகக் கூட்டத்தை நிறுத்து’ என்றனர். சிறிது சிறிதாக மக்கள் குவியத் தொடங்கினர். தேநீர்க் கடையில் இருந்த நானும் தோழர் மருத மூர்த்தியும் அங்கு ஓடினோம். “மரியாதையாக ஓடிவிடுங்கள். இரட்டை டம்ளர் அது இதுன்னு பேசினா… உயிரோட போக மாட்டீங்க. ஓடுங்கடா முதல்ல’ என்றனர். கடுமையான கெட்டவார்த்தை ஒன்றால் திட்டினர். தோழர் மூர்த்தி கொஞ்சம் ரோஷப்பட்டு, முகத்தில் கொஞ்சம் கோபத்தைக் காட்டிவிட்டார். உடனே ஒரு பத்துப்பேர் சேர்ந்து அவரைப் பிடித்துக் கீழே தள்ளினர். வேறொரு டீக்கடையில் இருந்து பிற தோழர்கள் ஓடிவந்தனர். வாகனத்தை சுமார் 50 பேர் சூழ்ந்து கொண்டனர். என்ன நடக்கிறது என்றே புரியவில்லை. பெட்ரோலை எடுத்துட்டு வாடா, வண்டியக் கொளுத்தணும் எனக் காட்டுக் கூச்சல் கேட்டது. தோழர் ஜவகர் அவர்களைத் தடுத்துக் கொண்டிருந்தார்.

“என்ன சொல்ல வர்றோம்னு கொஞ்சம் கேட்டுட்டுப் பேசுங்க, என நானும் கெஞ்சிப் பார்த்தேன். “பாத்தா படிச்சவன் மாதிரி இருக்க அறிவில்லையாடா ஒனக்கு? தி.க.ன்னா சாமியப் பத்திப் பேசு, 69 சதம் இடஒதுக்கீடு கேளு, அத விட்டுட்டு, இரட்டை டம்ளர்னு பேசுனா என்னடா அர்த்தம்? ஒரு மாசமா இங்க பிரச்சனை நடந்துகிட்டு இருக்கு, இங்க வந்து கலகம் பண்றீங்களா? யார் சொல்லிடா வந்தீங்க? எங்க பஞ்சாயத்து தலைவன் சொன்னானா? என்று கேள்வி கேட்டுக் கொண்டிருந்தார் ஒருவர். கூட்டமோ, என்னடா பேச்சு ஊத்துடா பெட்ரோல என்றது. சரி நாங்க பேசல. இப்படியே போயிடறோம் என்றோம். ஓடுங்கடா ஓடுங்கடா என விரட்டி விட்டனர்” என்கிறார் தாமரைக்கண்ணன்.

தேவகோட்டை பகுதியில் ‘நாடு’ அமைப்பு உள்ளது போல பழனி, தொப்பம்பட்டி, ஒட்டன்சத்திரம் ஒன்றியங்களில் உள்ள சாதி இந்து கவுண்டர்கள், சாதி வளர்ச்சிக்காக நிதி திரட்டி ஒருங்கிணைப்பாக உள்ளனர். இக்கிராமங்கள் “பண்டு கிராமங்கள்’ (Fund) என்று குறிப்பிடப்படுகின்றன. இக்கிராமங்களில் காவல் துறையோ, இந்திய அரசியல் சட்டமோ – சாதி இந்துக்களை மீறி எதுவும் செய்ய முடியாது. ஒரு ஊரில் தலித் மக்கள் ஏதாவது கலகம் செய்தால், கிட்டத்தட்ட 50 கி.மீ. சுற்றளவில் அவர்கள் பிழைக்க வழியிருக்காது என்ற நிலையை பண்டு கிராமங்கள் உருவாக்கியுள்ளன. வாகரை அம்மாதிரியான கட்டமைப்பில் உள்ள ஒரு கிராமம்.

வாகரையின் பஞ்சாயத்து தலைவராக இருப்பவர் பூசாரிக் கவுண்டன் வலசைச் சேர்ந்த அருந்ததியரான சின்னான். இவர் குடியிருக்கும் பூசாரிக் கவுண்டன் வலசு பகுதிக்கு குடிநீர் வசதி செய்து தருவதற்காக வாகரையிலிருந்து பைப்லைன் போட்டுள் ளார். சாதி இந்துக்கள் அந்த பைப் லைனை வெட்டி, தண்ணீர் கொண்டு செல்லவிடாமல் தடுத்துவிட்டனர். பிறகு மீண்டும் பைப்லைன் பதிக்கிறார். அதையும் சாதிவெறியர்கள் வெட்டி விட்டனர். எனவே, இது பற்றி தொப்பம்பட்டி பி.டி.ஓ.விடம் புகார் செய்த தலைவர், சின்ன தொப்பம்பட்டி பி.டி.ஓ. அலுவலகம் சென்றபோது, அவரை அலுவலக வாசலிலேயே கவுண்டர்கள் அடித்து உதைத்தனர். இது தொடர்பாக கள்ளிமந்தையம் காவல் நிலையத்தில் வன்கொடுமைத் தடுப்புச் சட்டத்தில் வழக்கும் பதிவு செய்யப்பட்டுள்ளது. அதன் பிறகு பஞ்சாயத்து தலைவர் சின்னான், சி.பி.எம். ஒன்றிய செயலாளர் அருள்செல்வனை அணுகி ஆதரவு கோரியுள்ளார். அதன் பிறகுதான் சட்டமன்றத்தில் இப்பிரச்சனை எழுப்பப்பட்டது.

உடனே திண்டுக்கல் கலெக்டர் வாசுகி வாகரைக்கு நேரில் சென்று விசாரித்து அங்கே இரட்டை டம்ளர் முறையோ, எந்த அடக்குமுறைகளுமோ கிடையாது என அறிவித்தார். தலைவர் சின்னõனும் அவ்வாறே கூற வைக்கப்பட்டார். பிறகு ஜெயா டி.வி.யில் கொடுமை நடப்பதாக தொலைபேசியில் கூறினார். இந்த சிக்கல் அண்மையில் நடந்துள்ளதால், அந்த பஞ்சாயத்து தலைவர் சின்னான் சொல்லித்தான் பிரச்சாரக் குழுவினர் வந்திருப்பார்கள் என சாதி இந்துக்கள் கருதியிருக்கின்றனர். அதன் பிறகு பிரச்சாரக் குழுவினர் அங்கிருந்து தப்பி 12 கி.மீ. தொலைவிலுள்ள கள்ளிமந்தையம் காவல் நிலையத்தில் புகார் தந்துள்ளனர். உதவி ஆய்வாளர் சீனிவாசன் புகாரை வாங்க மறுத்திருக்கிறார்.

“யாரைக்கேட்டு அங்கு சென்றீர்கள்? யாரைக் கேட்டு உள்ளே நுழைந்தீர்கள்’ என மிரட்டி, புகாரையும் வாங்க மறுத்திருக்கிறார். அதற்குள் செய்தி கேள்விப்பட்டு பழனி ஒட்டன்சத்திரம் பகுதியிலிருந்து சுமார் 50 தோழர்கள் காவல் நிலையம் முன் திரண்டனர். அதே நேரத்தில் துண்டறிக்கையில் இருந்த தாமரைக் கண்ணனின் எண்ணை வைத்து, பண்டு கிராமப் பகுதியிலிருந்து அவரது எண்ணுக்கு ஒருவர் தொடர்பு கொண்டுள்ளார். தன்னை ஒடுக்கப்பட்ட சமுதாயத்தைச் சேர்ந்தவர் என அறிமுகப்படுத்திக் கொண்ட அவர், “உங்களைத் தாக்க பண்டு கிராமம் எல்லாம் திரளுகிறது. உடனே கள்ளிமந்தையத்தை விட்டுக் கிளம்புங்கள்’ என்று கூறியுள்ளார்.

இருப்பினும், புகார் கொடுக்காமல் அங்கிருந்து செல்ல மனமின்றி பிரச்சாரக் குழுவினர் புகாரை வாங்கச் சொல்லி, உதவி ஆய்வாளரிடம் வாதம் செய்து கொண்டி ருந்திருக்கின்றனர். அச்சமயம், இரவு 7 மணி அளவில் 2 மினி லாரிகளில் சாதி இந்துக்கள் சுமார் 100 பேர் அங்கு வந்து இறங்கினர். 7.15 மணியளவில் மீண்டும் 2 மினி லாரிகளில் ஆட்கள் இறங்கினர். காவல் நிலையத்தில் உதவி ஆய்வாளர் மட்டுமே இருந்திருக்கிறார். காவலர்கள் யாரும் இல்லை. அதனால் அந்த உதவி ஆய்வாளர் வெளியே வந்து கவுண்டர்களிடம் பேசி, “உங்கள் புகாரைக் கொடுங்கள் வாருங்கள்’ எனக் கூறி, அவர்களைத் தனியே அழைத்துச் சென்றுள்ளார். கவுண்டர்கள் விலகிச் சென்ற உடன், பிரச்சாரக் குழுவினர் தப்பி ஓடி வந்துள்ளனர்.

ஆனால், இப்பிரச்சினையை பெரியார் திராவிடர் கழகத்தினர் இத்துடன் விடுவதாக இல்லை.

“எத்தனை நாட்கள்தான் மென்மையாகப் போராடுவது? சாதி வெறியர்களுக்கு அழுத்தமாக உணர்த்தும் வகையில் எங்களது அடுத்தகட்ட நடவடிக்கை இருக்கும். ஒத்த கருத்துள்ள அமைப்புகள், தோழமை இயக்கங்கள் ஆகியவற்றையும் இணைத்துக் கொண்டு, அதே கிராமங்களில் ஆகஸ்டு 15 அன்று இரட்டை டம்ளர் மற்றும் இரட்டை பெஞ்சு உடைப்புப் போராட்டத்தை நடத்த உள்ளோம். அது வரையில் மே 26 தொடங்கி அக்கிராமங்களில் உள்ள ஒடுக்கப்பட்ட மக்களை அணி திரட்டும் பணிகளை செய்யத் திட்டமிட்டுள்ளோம்” என்கிறார் பெரியார் திராவிடர் கழகத் தலைவர் கொளத்தூர் மணி.

உண்மைதான். சாதியின் கோர முகத்தை மென்மையான கரங்களால் பிய்த்து எறிய முடியாது. சாதி தனது இருப்பை என்றுமே மென்மையாக வெளிக் காட்டியதில்லை. கீழ் வெண்மணி, மேலவளவு, கயர்லாஞ்சி என எங்கும் நாம் கண்டது, சாதியின் கொடூர முகத்தை மட்டுமே. எதிர்ப்புகளும் போராட்டங்களும் மட்டும் எதற்கு மென்மையாய்?

படித்தது.

ஜாதி, தலித் விடுதலை இல் பதிவிடப்பட்டது . Leave a Comment »

அயோத்தியில் மசூதி கட்ட அத்வானி கோரிக்கை?!

மும்பை புறநகர் ரயில்களில் கடந்த ஆண்டு ஜூலை 11ம் தேதி தொடர் குண்டுகள் வெடித்தன. அந்த சம்பவத்தில் 187 பேர் பரிதாபமாக உயிரிழந்தனர்; பலர் படுகாயமடைந்தனர். அவர்களில் பெரும்பாலானவர்கள் இன்னும் மருத்துவமனைகளில் சிகிச்சை பெற்று வருகின்றனர்.

காயமடைந்தவர்களில் பரக் சவந்த் மற்றும் அமித் சிங் என்னும் இருவர் இன்னும் “கோமா’ நிலையில் சிகிச்சை பெறுகின்றனர். அவர்களுடைய குடும்பத்தினரை பா.ஜ.க முன்னாள் தலைவர் அத்வானி நேற்று சந்தித்து ஆறுதல் கூறினார்.

அதன் பிறகு, நிருபர்களிடம் அத்வானி பேசுகையில், “மத்திய அரசு, ரயில்வே துறை மற்றும் மாநில அரசு இணைந்து, குஜராத், கோவை, மும்பை, மாறாடு முதலிய கலவரங்களில் பாதிக்கப்பட்டவர்களுக்கு நிவாரண உதவி மற்றும் மறுவாழ்வு அளிக்க விரைந்து நடவடிக்கைகளை எடுக்க வேண்டும். இன்னும் பலருக்கு நிவாரண உதவி கிடைக்கவில்லை என்று தெரிவித்தனர். இந்த சம்பவம்கள் நடந்து பல 11 மாதங்கள் கடந்தும், வழக்கு விசாரணைகள் முடியாமல் இன்னும் தீர்ப்பு வழங்கப்படவில்லை. அதனால், இவ்வழக்குகளை விரைவாக முடித்து, எங்களால் பாதிக்கப்பட்டவர்களுக்கு நீதி வழங்க வேண்டும்’ என்றார். மேலும், “எங்களால் இடிக்கப்பட்ட இந்தியவரலாற்றுசின்னம் பாபர் மஸ்ஜிதை திரும்ப எழுப்பவும் நாட்டில் அமைதி ஏற்பட ஆர்.எஸ்.எஸ் உட்பட அனைத்து தனியார் மத/இன அமைப்புகளை தடை செய்யவும் மத்திய அரசும் உச்சநீதி மன்றமும் ஆவன செய்ய வேண்டும்” என கோரிக்கை வைத்தார்.

அடவேற ஒண்ணுமில்லீங்க. அத்வானிஜி தனது கடைசி காலத்தில், உண்மையிலேயே இந்திய நாட்டின் மீது பற்று கொண்டு பேட்டி கொடுத்தால் எப்படி இருக்கும் என நினைத்துப் பார்த்தேன். அவ்வளவு தான்.

ஆர்.எஸ்.எஸ், சிந்தனைகள் இல் பதிவிடப்பட்டது . Leave a Comment »

அதிசயம் – அந்தோணியார் தலையில் இரத்தம்!

சிதம்பரத்திலுள்ள புதுச்சத்திரம் அருகே பெரியபட்டு கிறிஸ்துவ தேவாலயத்தில் அந்தோனியார் சிலையின் தலையிலிருந்து ரத்தம் வழிந்ததால் பரபரப்பு ஏற்பட்டது.

கடலூர் மாவட்டம் புதுச்சத்திரம் அடுத்த பெரியபட்டு கிராமத்தில் பல நூற்றாண்டுக்கு முன்பு ஆங்கிலேயர் ஆட்சி காலத்தில் கட்டப்பட்ட தேவாலயம் ஒன்று உள்ளது. இதில் ஆரோக்கியதாஸ் என்பவர் பங்கு தந்தையாக உள்ளார். இவர் ஆலய வளாகத்தில் உள்ள வீட்டில் தங்கி இருக்கிறார். இந்த ஆலயத்தில் புதுச்சத்திரம், பெரியபட்டு உள்ளிட்ட பகுதியை சுற்றியுள்ள கிராமங்களில் இருந்து கிறிஸ்துவர்கள் வழிபாட்டுக்கு வந்து செல்கின்றனர். இந்நிலையில் நேற்று முன்தினம் இரவு 1 மணியளவில் வீட்டில் தூங்கிக் கொண்டிருந்த பங்குதந்தை ஆரோக்கியதாஸ் சத்தம் போட்டு கத்தினார். உடன் ஆலய வளாகத்தின் வெளியில் தூங்கிக் கொண்டிருந்தவர்கள் சென்று பார்த்த போது ஆரோக்கியதாஸ் மயங்கிய நிலையில் கிடந்தார். அவர் மயக்கம் தெளிந்து பேசும்போது, “ஏதோ ஒரு அசம்பாவிதம் நடந்துள்ளது. எனது தலையில் பலத்த அடிபட்டது போல் உணர்ந்தேன். நான் மயங்கி விழுந்ததும் ஒன்றும் புரியவில்லை. நீங்கள் உடனடியாக ஆலயத்தின் உள்ளே சென்று பாருங்கள்” என்று கூறினார்.

உடன் அங்கிருந்தவர்கள் ஆலயத்தை திறந்து சென்று பார்த்த போது அங்குள்ள அந்தோனியார் சிலையின் தலை பகுதியில் இருந்து ரத்தம் வடிந்து கொண்டிருந்ததை கண்டு திடுக்கிட்டனர். காட்டுத்தீ போல் பரவிய இச்செய்தி அறிந்து அப்பகுதி பொது மக்கள் நேற்று காலை முதல் ஆலயத்திற்கு வந்து அந்தோணியார் சிலையின் தலையிலிருந்து வடியும் இரத்தத்தை ஆச்சரியத்தோடு பார்த்துச் செல்கின்றனர்.

அதிசயம் இல் பதிவிடப்பட்டது . 3 Comments »

தமிழர்களை பலவந்தமாக வெளியேற்றுவதற்கு எதிராக நீதிமன்றம்!

கொழும்பு: இலங்கை தலைநகரான கொழும்புவில் தமிழர்களுக்கு எதிராக இலங்கை அரசு துவக்கிய இன சுத்தீகரிப்பு நடவடிக்கைகளை உடனடியாக நிறுத்தி வைக்க வேண்டும் என இலங்கை உச்சநீதி மன்றம் கட்டளை பிறப்பித்தது.  தலைநகரில் வசித்து வந்த தமிழர்களை இலங்கை காவல்துறை கைதுசெய்து இலங்கையின் வடக்கு பகுதிகளுக்கு மாற்றிய நடவடிக்கைக்கு எதிராக செண்டர் ஃபார் பாலிஸி ஆல்டர்நேட்டீவ்ஸ்(Center for Policy Alternatives) என்ற அமைப்பு தாக்கல் செய்த வழக்கில் உச்சநீதி மன்றம் இத்தீர்ப்பை வழங்கியது.

ஜூன் 22 ஆம் தேதி இவ்வழக்கு தொடர்பாக வாதம் கேட்பது வரை காவல்துறை அதிகாரிகள் தமிழர்களுக்கு எதிரான இந்நடவடிக்கையை நிறுத்தி வைக்க வேண்டும் எனவும் நீதிமன்றம் கட்டளை பிறப்பித்தது.

கொழும்புவில் ஹோட்டல்களிலும் மற்ற இடங்களிலும் தங்கியிருந்த 400 க்கும் மேற்பட்ட தமிழர்களை கடந்த தினம், நகரத்தில் விடுதலைப் புலிகளின் ஊடுருவலை தடைகின்றோம் என்ற பெயரில் வெளியேற்றப்பட்டனர். இவர்களை பத்திக்கலோவா, வவுனியா போன்ற இடங்களுக்கு காவல்துரை அனுப்பியது.

இவ்வெளியேற்றத்தை இன சுத்தீகரிப்பு எனக் கூறி இதற்கு எதிராக ஃப்ரீ மீடியா மூவ்மெண்ட்(Free Media Movement) என்ற மனித உரிமை கழகமும் போராட்டத்தில் குதித்திருந்தது.

இலங்கையின் தலைநகரிலிருந்து விடுதலைப் புலிகளுக்கு எதிராக நடவடிக்கை எடுக்கின்றோம் என்ற பெயரில் தமிழர்களை வடக்குப் பகுதிக்கு நாடுகடத்திய இலங்கை காவல்துறையின் செயல்பாடு, அவர்களே தனி தமிழீழத்தை அங்கீகரித்ததற்கு ஒப்பாகும் என இதற்கு இதற்கு எதிராக தே.மு.தி.க தலைவர் நடிகர் விஜயகாந்த் அவர்களும் சமீபத்தில் அறிக்கை வெளியிட்டிருந்தார்.

இலங்கை, செய்திகள் இல் பதிவிடப்பட்டது . 3 Comments »