பாகல்பூர் கலவரம் – 14 பேர் குற்றவாளிகள்.

பீகார் மாநிலம் பாகல்பூரில் சிறுபான்மை இனத்தவர்களுக்கு எதிராக ஹிந்துத்துவ நாச சக்திகளால் 1989 – ல் கலவரம் நடத்தப்பட்டது. இதில் சிறுபான்மையினர் 116 பேர் பரிதாபமாக உயிரிழந்தனர். இவ்வழக்கில் காவல்துறை அதிகாரி மற்றும் கிராம தலைவர் உட்பட 24 பேர் மீது வழக்கு பதிவு செய்து குற்றம்சாட்டப்பட்டது. 18 வருடங்களுக்குப் பிறகு இவ்வழக்கு தற்போது முடிவுக்கு வந்துள்ளது. இவ்வழக்கில் குற்றம்சாட்டப்பட்டவர்களில் 14 பேர் குற்றவாளிகள் என நீதிமன்றம் அறிவித்துள்ளது.

இந்த வழக்கை விசாரித்த நீதிபதி ஷம்புநாத் மிஸ்ரா, இவர்களுக்கான தண்டனை இம்மாதம் 27ம் தேதி அறிவிக்கப்படும் என்றார்.வழக்கின் முடிவு குறித்து கேட்டுக் கொண்டிருந்த குற்றவாளிகளில் ஜெய் பிரகாஷ் மண்டல் என்பவர் நீதிமன்றத்திலிருந்து தப்பியோடி விட்டார். அவரைப் பிடிக்க பிடிவாரண்டு பிறப்பிக்கப்பட்டுள்ளது.

இவ்வழக்கில் குற்றம் சாட்டப்பட்டவர்களில் இந்த சம்பவம் நடைபெற்ற போது ஜக்தீஷ்பூர் காவல்நிலையத்தின் பொறுப்பாளராக இருந்த ராமச்சந்திர சிங் மற்றும் கிராமத்தலைவர் தாக்குர் பாஸ்வான் ஆகியோரும் குற்றவாளிகளே என தீர்ப்பளிக்கப்பட்டுள்ளது குறிப்பிடத்தக்கதாகும்.

இந்த சம்பவத்தில் குற்றம் சுமத்தப்பட்ட 24 பேர்களில் 6 பேர் மரணமடைந்துவிட்டனர். மற்ற நான்கு பேர் தலைமறைவாகியுள்ளனர்.நாட்டில் நடந்த சிறுபான்மையினருக்கு எதிரான கலவரங்களில் மிக அதிகபட்சமாக குற்றம் சுத்தப்பட்டவர்கள் அனைவருமே குற்றவாளிகள் என தீர்ப்பளிக்கப்பட்டது இதுவேமுதல்முறை என கருதப்படுகிறது.

இந்தியா, செய்திகள் இல் பதிவிடப்பட்டது . Leave a Comment »

ஹாலிவுட்டில் நிறவெறி!

ஹாலிவுட் பட உலகை அடக்கி ஆழும் மனிதத்தன்மைக்கு எதிரான நிறவெறி முதன் முதலாக நீதிமன்றத்தில் கேள்விக்குட்ப்படுத்தப்படுகிறது.

2003 ல் பாக்ஸ் ஆஃபிஸ் ஹிட்டான ஃபாஸ்ட் அண்ட் ஃப்யூரியஸ் என்ற சினிமாவில் இணை டைரக்டராக பணியாற்றிய ப்ராங்க் டாவிஸ், தன்னை வேலையிலிருந்து வெளியேற்றிய யூனிவர்ஸல் பிக்ஸர்ஸ் ஸ்டுடியோவின் அராஜக செயலுக்கு எதிராக நீதிமன்றத்தில் வழக்கு தொடர்ந்தார்.

ஸ்டுடியொவின் இச்செயல்பாடு 1964 – ல் இயற்றப்பட்ட குடியுரிமை சட்டத்திற்கு எதிரானது என்று அனைத்து சமதொழில் உரிமை கமிஷன் அறிவித்திருக்கின்றது.

இந்த படத்தின் கதாநாயகனாக ஜான் ஸிங்கிள்டன் என்ற மற்றொரு கறுப்பினத்தை சேர்ந்தவர் நடித்திருந்தார். இவர் தான் தனக்கு முந்தைய பல படங்களில் நடிப்பதற்கு வாய்ப்பு தேடி தந்த டாவிஸை சக துணைடைரக்டராக நியமிக்க வைத்தவர். ஆனால் இவருக்கு அதற்கான எவ்வித தகுதியும் இல்லை எனக்கூறி ஸ்டுடியோ டாவிஸை வேலையை விட்டு நீக்கியது.

தன் தோலின் நிறம் தான், தன்னை வேலையை விட்டு நீக்க முக்கிய காரணம் என டாவிஸ் கூறுகின்றார். தனக்கு நிச்சயிக்கப்பட்ட சம்பளமே மற்றவர்களை விட மிகக் குறைவாக இருந்தது என்றும் அவர் கூறினார்.

ஹாலிவுட்டில் நிறவெறி என்பது சர்வசாதாரணமான விஷயம் என்ற போதிலும், பாதிக்கப்பட்டவர்கள் யாரும் இதற்கு எதிராக இதுவரை வெளிப்படையாக வந்ததில்லை என்றும் உரிமை போராட்டத்தின் வரலாற்றில் இவ்வழக்கு ஒரு மைல்கல் எனவும் சம உரிமை போராட்ட கழகத்தினர் தெரிவித்தனர்.

வழக்கில் அனைத்து ஆதாரங்களும் டாவிஸிற்கு சாதகமாக இருக்கும் நிலையில், இவ்வழக்கின் தீர்ப்பு டாவிஸிற்கு சாதகமாக அமையவே வாய்ப்புள்ளது என சம உரிமை போராட்ட கமிஷனின் வழக்கறிஞர் அன்னா பார்க் கூறினார். சமீப காலங்களில் டென்செல் வாஷிங்டன், ஹாலெ பெரி போன்றவர்கள் ஆஸ்கார் போன்ற முக்கியத்துவம் வாய்ந்த இடங்களில் அங்கீகரிக்கப்பட்ட நிலையில் ஹாலிவுட்டில் நிறவெறி குறைந்து வருவது போன்ற எண்ணத்தை அவை ஏற்படுத்தியிருந்தன. ஆனால், இவையெல்லாம் வெறும் வெளிக்காட்சிகள் மட்டுமே என்பது தற்போது உறுதியானதாக அன்னா பார்க் கூறினார்.

உலகம், செய்திகள் இல் பதிவிடப்பட்டது . Leave a Comment »

மதமாம், ஜெபமாம், விபச்சாரமாம்!

கம்ப்யூட்டர் மயமான இந்த இருபத்து ஒன்றாம் நூற்றாண்டில் ஒரு விசித்திர சம்பவம் நடந்துள்ளது.

கோவை, பாப்பநாயக்கன்பாளையம், அன்னை இந்திரா நகரில், சொகுசு பங்களாவில் தனது குடும்பத்துடன் வசித்து வருகிறார் மதபோதகர் சார்லஸ். திருச்சி மாவட்டம், துவரங்குறிச்சியைச் சேர்ந்த இவர், மின்சாரத்துறையில் உதவிப் பொறியாளராகப் பணிக்குச் சேர்ந்தார். பிறகு குறி, ஜெபம் என்று தன்னை மதபோதகராகக் காட்டிக் கொண்டதில் கையில் காசு புரண்டது. எனவே அரசுப் பணியை உதறினார்.

சார்லஸின் பேச்சில் மயங்கிய பலரும் அவரோடு ஊழியத்தில் (ஜெபத்தில்) இணைந்துகொள்ள, கார் பங்களா என தனது வசதிகளைப் பெருக்கிக்கொண்டார். எப்போதும் தனது காரில் குட்டி, புட்டிகளுடன் வலம் வந்தார்.

fraud.jpg

இந்நிலையில்தான் கடந்த புதனன்று, சார்லஸின் சகோதரர் செல்வக்குமாரின் மனைவி அனுராதா, கோவை ரேஸ் கோர்ஸ் போலீஸில் பரபரப்பு புகார் ஒன்றைக் கொடுத்தார்.
அன்று இரவே அதிரடியாக சார்லஸின் வீட்டுக்குள் நுழைந்து மாடியில் இருந்த பூட்டை உடைத்து உள்ளே நுழைந்த போலீஸôர் அதிர்ச்சியில் நிலை குலைந்து போயினர். அங்கே அறை முழுவதும் புழுக்கள் நெளிய, சிதைந்த எலும்புக் கூடாக ஒரு ஆண் சடலம். அது தனது கணவர் செல்வக்குமார்தான் என அனுராதா அடையாளம் காட்ட பரபரப்பு மேலும் கூடியது.

“என்ன நடந்தது?’ என்பதை செல்வக்குமாரின் மனைவி அனுராதாவே நம்மிடம் விவரித்தார்.

“இனி என்னத்த சொல்றது? அண்ணனைப் பார்த்துட்டு வர்றேன்னு போன ஏப்ரல் 2-ஆம் தேதி எங்களை விட்டு வந்தவரு, இப்ப என்னையும் எனது குழந்தைகளையும் அநாதையாக்கிட்டு போய்ட்டாரே” எனக் கதறியவரை நாம் சமாதானப்படுத்திப் பேச வைத்தோம்.

“என் புருஷன் கொஞ்சம் பயந்த சுபாவம். மூனு மாசத்துக்கு முன்னாடி நைட்டு எதையோ பார்த்துட்டு பயந்தவர், வீட்டில் யாருகிட்டேயும் எதுவும் பேசாமல் இருந்தார். அப்பதான், அண்ணனை போய் பார்த்தா சரியாகிடும்னு எங்ககிட்ட சொல்லிட்டு கோயம்புத்தூர் வந்துட்டாரு. அவுங்க அண்ணன் சார்லஸ் ஊழியத்தில் இருக்கிறதால் குணப்படுத்தி விடுவார்னு நம்பிக்கையில அவரை அனுப்பி வச்சோம்.

ஆனா மூனு மாசமாக என் புருஷனை பத்தி எந்தத் தகவலும் இல்லை. அவுங்க அண்ணன் சார்லஸுக்கு ஃபோன் பண்ணி என் கணவரைப் பத்திக் கேட்டா, வெளியூர் போயிருக்கான், ஒரு ஊழியத்துல இருக்கான்னு சொல்லியே எங்களை சமாளிச்சுட்டு வந்தாரு.

இதனால எங்களுக்கு சந்தேகம் வந்து, போன புதன்கிழமை உறவினர்களோடு கோவை வந்தேன். சார்லஸ் வீட்டுக்கு போனப்ப வீடு பூட்டிக் கிடந்தது. கீழ் வீட்டில் வாடகைக்கு குடியிருக்கும் வின்சென்ட், அக்கம் பக்கத்துல கேட்டப்ப யாரும் எந்த பதிலும் சொல்லலை. அப்ப நான் மாடிக்கு போனேன்.

அங்கே ஒரு விதமான வாடை வீசியது. சந்தேகமடைந்து போலீஸுக்குச் சொன்னோம். அவுங்களும் வந்து கதவை உடைச்சு பார்த்தப்போ சார்லஸ் தனது மனைவி, குழந்தைகளுடன் கட்டில் அருகில் அமர்ந்து பிரார்த்தனை செய்து கொண்டு இருந்தார். எனது கணவர் செல்வக்குமார் கட்டிலில் உடல் அழுகி இறந்து கிடந்தார். பாவிப்பய ஊழியம் செய்யுறேன்னு சொல்லி என் புருஷனை கொன்னுட்டான்” எனக் கதறினார் அனுராதா.

இதையடுத்து அருகிலிருந்த செல்வக்குமாரின் மைத்துனர் சாமுவேல் துரைராஜ் நம்மிடம், “ஊழியம் பண்றேன், ஜெபம் பண்றேன்னு சொல்லிட்டு மக்களை ஏமாற்றி காசு வாங்குறதுதான் சார்லஸ்சோட வேலையே…! குடும்பப் பிரச்சினைன்னு சொல்லி யாராவது இவன்கிட்ட வந்தாங்கன்னா குடும்பத்தை நிரந்தரமா பிரிப்பதோடு, பொம்பளைகளை தன் பக்கம் சேர்த்துக்குவான். அப்புறம் அவுங்களை தன்னோட “ஊழியத்துக்கு’ பயன்படுத்திக்குவான். எப்பவுமே சார்லஸோட ஐந்து, ஆறு பொண்ணுங்க இருப்பாங்க.

அவுங்களை எங்க எங்கேயோ கூட்டிட்டுப் போவான். ஜெபம் என்ற பெயர்ல இவன் விபச்சாரத் தொழில் செய்றானோன்னு சந்தேகம் எங்களுக்கு இருக்கு. ஏன்னா இவனோட கௌரி, இந்திரான்னு ரெண்டு பொம்பளைங்க எப்பவும் கூடவே இருப்பாங்க. இவங்களோட மோசமான தொழில் பற்றி அந்த ஏரியாவுக்கே தெரியும். இவங்களை புடிச்சு போலீஸ் விசாரிச்சா எல்லா உண்மையும் தெரிஞ்சிடும்…
போலீஸ் சொல்ற மாதிரி இவன் சைக்கோவெல்லாம் கிடையாது. கிரிமினல்… மச்சான் தூக்குப்போட்டு தற்கொலை செய்யுற அளவுக்கு கோழை அல்ல, அவரை கொலை பண்ணியிருப்பாங்களோன்னு எனக்கு சந்தேகமா இருக்கு… இந்த சார்லஸ் பத்தின முழு விவரத்தையும் போலீஸ் விசாரிக்கணும். அப்பதான் உண்மை தெரியும்” என்றார்.

இதற்கிடையே போலீஸ் பிடியில் இருந்த மதபோதகர் சார்லஸ் தனது வாக்கு மூலத்தில், “ஏப்ரல் 6-ஆம் தேதி பிரார்த்தனைக்காக நான் வெளியூர் போய்ட்டேன். அப்ப வீட்டில் தனியா இருந்த என் தம்பி செல்வக்குமார் மனபயத்தால் மின் விசிறியில் தூக்குப் போட்டு தற்கொலை செய்து கொண்டார்.

தை என் மனைவி எனக்குச் சொன்னார். இயேசுவின் ஆணையின் பேரில் அவர் மீண்டும் உயிர்த் தெழுவார் என்ற நம்பிக்கையில் இறந்த எனது தம்பியை மீண்டும் உயிர்ப்பிக்க ஜெபம் செய்தோம். 90 நாட்களில் தம்பியை உயிர்ப்பித்து இருப்பேன். உடல் அசைந்து தம்பி உயிர்த் தெழுவதற்கான காலகட்டம் வந்த நிலையில்தான் போலீஸாரும், தம்பி குடும்பத்தினரும் கெடுத்து விட்டனர். தம்பியின் ஆவியுடன் பேசியதில் அவனது கை, கால்களில் அசைவு தெரியத் துவங்கியது. அதற்குள் அவனை உயிர்ப்பிக்க முடியாமல் சாகடித்துவிட்டனர்” என கேஷுவலாக சொல்ல போலீஸாரே அதிர்ச்சியடைந்துவிட்டனர்.

இந்நிலையில் அறுபது நாட்களாக பிண வாடை அக்கம் பக்கம் தெரியாமல் இருக்க, கெமிக்கல்களையும், அறையில் காற்று புகாத வண்ணம் அடைப்புகளையும் ஏற்படுத்தி யாருக்கும் சந்தேகம் வராமல் செய்திருக்கிறார் சார்லஸ். தற்போது சுகாதார சீர்கேடு விளைவித்தல், இறப்பு பற்றி போலீஸுக்கு தகவல் கொடுக்காமல் மறைத்தல் ஆகிய பிரிவுகளின் கீழ் மத போதகர் சார்லஸ், அவரது மனைவி சாந்தி, வின்சென்ட், அவரது மனைவி ஜெயசீலி, உறவினர் ஜான்சன் ஆகிய ஐந்து பேரையும் கைது செய்துள்ள போலீஸ் இவர்களின் பின்னணி பற்றியும் தீவிரமாக விசாரித்து வருகிறது.

படித்தது

செய்திகள், தமிழகம் இல் பதிவிடப்பட்டது . Leave a Comment »

ஆப்கன் காவல்துறையினருக்கு யு.எஸ்ஸின் அன்பு பரிசு!

கிழக்கு ஆப்கானிஸ்தான் பிரதேசமான நன்கார்ஹரில் ஏழு ஆப்கானிஸ்தான் காவலர்களை கடந்த திங்கள் கிழமை இரவு அமெரிக்க படையினர் சுட்டுக் கொன்றனர்.  அமெரிக்க-ஆப்கன் கூட்டு படையினர் மீது துப்பாக்கி குண்டுகள் பாய்ந்ததை தொடர்ந்து எதிர்த்து சுட்டதில் இவர்கள் இறந்ததாக அமெரிக்க படையினர் தெரிவித்தனர்.

ஆனால் இறந்தவர்கள் ஆப்கானிஸ்தான் காவலர்கள் என்பதை இதுவரை அமெரிக்க படை உறுதிபடுத்தவில்லை. ஆனால் அதே சமயம் நான்கஹார் பகுதியில் உள்ள ஒரு செக்போஸ்டின் மீது எவ்வித காரணமும் இன்றி அமெரிக்க இராணுவம் துப்பாக்கிச் சூடு நடத்தியதாக அப்பகுதியில் பாதுகாப்பு பணியில் ஈடுபட்டிருந்த ஆப்கான் காவல்துறை அமெரிக்க இராணுவத்தின் மீது குற்றம் சுமத்தியது.
அமெரிக்க தரைப்படையினரின் தாக்குதலுடன் ஆப்கான் காவல்துறையினர் மீது அமெரிக்க விமானப்படையும் குண்டுகளை பொழிந்ததாக முதிர்ந்த காவல்துறை அதிகாரி நஸிர் அஹமது கூறினார். அமெரிக்கப்படையினரின் இச்செயல் கொடூரமானது என்றும் அவர் கூறினார். துக்ககரமான விபத்து என இச்சம்பவத்தை ஆப்கான் அதிபர் கர்ஸாயின் செய்தி தொடர்பாளர் கரீம் ரஹீமி தெரிவித்தார்.

மற்றொரு சம்பவத்தில் குனார் பிரதேசத்திலும் மேற்கு ஆப்கானிஸ்தானிலும் பொது மக்களில் மூன்று பேரை நேட்டோ படை சுட்டுக் கொன்றது. செக்போஸ்டில் வாகனத்தை நிறுத்தாதை தொடர்ந்து துப்பாக்கி சூடு நடத்தியதாக நேட்டோ படை இதற்கு காரணம் கூறியது. கடந்த ஏப்ரல் மாதம் பொதுமக்களில் 50 பேரை நேட்டோ படை சுட்டுக் கொன்றதை தொடர்ந்து, இது போன்ற நடவடிக்கைகளை நிறுத்தி வைக்க வேண்டும் என நேட்டோ மற்றும் அமெரிக்க படையினரிடம் அதிபர் கோரிக்கை விடுத்திருந்தார் என்பது குறிப்பிடத்தக்கது.

உலகம், செய்திகள் இல் பதிவிடப்பட்டது . Leave a Comment »

கொடுமை – கின்னஸ் படுத்தும்பாடு!

 பணபைத்தியங்களைகேள்விப்பட்டிருப்பீர்கள். இதுபுகழ்பைத்தியங்களைக்குறித்தது.

கீழேகாணும் படத்தை பாருங்கள் – வெறும் 15 மாதமே ஆன பச்சிளங் குழந்தையை தண்ணீரில் போட்டு கொடுமைப்படுத்துவதை.

ginnus.jpg
சென்னை, திருவல்லிக்கேணி வி.ஆர்.பிள்ளை தெருவை சேர்ந்த தம்பதி கமலாகர், விஜயலட்சுமி. இவர்களது மகன் மஹாரந்த் கமலாகர். பிறந்து 15 மாதங்களே ஆன இந்த பச்சிளங் குழந்தையை கின்னஸில் இடம் பிடிக்க வைக்க வேண்டும் என்பதற்காக விஜயலட்சமியின் தம்பி அருண் பாலாஜியிடம் நீச்சல் பயிற்சி எடுக்க வைத்து வருகின்றனர்.

சென்னை காஸ்மோபாலிடன் கிளப்பில் நேற்று மாலை கின்னஸில் இடம் பிடிப்பதற்காக இப்பச்சிளங் குழந்தையை வைத்து பாலாஜி முயற்சி மேற்கொண்டார். இந்த கொடுமையை பார்க்க பலர் அங்குள்ள நீச்சல் குளத்தின் முன் கூடியிருக்கின்றனர். குழந்தை மஹாரந்த் நான்கு மீட்டர் தூரம் மூச்சடைத்து நீந்தியதைப் பார்த்து கூடியிருந்தவர் கைதட்டி ஆரவாரம் செய்தனர்.

குழந்தையின் தாயார், “ஆஸ்திரேலியாவில் இரண்டரை வயது குழந்தை ஒன்று தண்ணீரில் கை, கால்களை அசைத்து மிதப்பதை பார்த்தோம். அப்போது எங்களுக்கு மஹாரந்த்தையும் குறைந்த வயதில் நீந்த வைக்க வேண்டும் என்ற எண்ணம் ஏற்பட்டது. அவனுக்கு ஒரு வயது ஆன போது நீச்சல் குளத்தில் தண்ணீரில் போட்டோம். அவன் அழவில்லை. நீச்சலடிப்பதில் அவனிடம் முன்னேற்றம் தெரிந்தது. இதையடுத்து அவனுக்கு பயிற்சியளித்து வருகிறோம். தினசரி ஒரு மணி நேரம் பயிற்சி மேற்கொள்வான். எனது மகன் சிறந்த நீச்சல் வீரனாகி, பல்வேறு நீச்சல் போட்டிகளில் கலந்து கொண்டு விருதுகள் பெற வேண்டும் என ஆசைப்படுகிறேன்.” என்று கூறினார்.

புகழ் மயக்கம் இப்படியா தாய்மையையும் பலி கொள்ளும்?

சிந்தனைகள், செய்திகள், தமிழகம் இல் பதிவிடப்பட்டது . 6 Comments »

குவாண்டனமோ மூடப்பட வேண்டும் – பவல்!

குவாண்டனமோ வன்கொடுமைசாலையை எவ்வளவு வேகமாக இழுத்து மூட முடியுமோ அவ்வளவு வேகத்தில் இழுத்து மூட தயாராக வேண்டும் என அமெரிக்க முன்னாள் செயலாளர் காலின் பவல் கோரிக்கை விடுத்தார்.

குவாண்டனமோ சிறைச்சாலை அமெரிக்காவிற்கு மிகப்பெரிய பாதகம் என்றும், சர்வதேச அளவில் அது தேசத்தின் பெருமைக்கு களங்கம் விளைவிக்கின்றது என்றும் பவல் கூறினார். குவாண்டனமோ சிறைச்சாலையை உடனடியாக மூடி விட்டு அங்கு கொடுமைப்படுத்தப்படும் 380 க்கும் மேற்பட்ட சிறைவாசிகளை அமெரிக்க ஃபெடரல் சட்டத்தின்படி விசாரணை செய்ய வேண்டும் எனவும் குவாண்டனமோ எதிர்பார்த்ததைப் போன்றல்லாமல் அமெரிக்காவிற்கு நன்மையை விட தீமைகளையே அதிகம் விளைவிக்கின்றது என்று அவர் கூறினார்.

உலகம், செய்திகள் இல் பதிவிடப்பட்டது . 2 Comments »

வருங்கால முதல்வரே வருக!

யாரப்பா அந்த புதிய வரவு என்று கலங்க வேண்டாம். எல்லாம் நம்ம நாட்டாமை அய்யாதான். நாட்டாமை அண்ணாச்சி என்ன சொல்றாருன்னு பார்ப்போமா?:

“விரைவில் நான் தொடங்க உள்ள புதிய கட்சியின் கொள்கைகளை வகுக்க ஓய்வு பெற்ற 30 ஐஏஎஸ் அதிகாரிகளைக் கொண்ட குழுவை அமைத்துள்ளேன்.

நாட்டின் பொருளாதாரம், தொழில், கல்வி உள்ளிட்ட பல்வேறு துறைகளின் வளர்ச்சிக்காக தொலைநோக்குடன் கூடிய கொள்கைகள் வகுக்கப்படும்.

எனினும், மக்களிடையே அரசியல் விழிப்புணர்வை ஏற்படுத்துவதே கட்சியின் முதலாவது கொள்கையாக இருக்கும்.

எனக்கோ அல்லது எனது சகாக்களுக்கோ தமிழகத்தின் முதல்வராக ஆசை இல்லை. ஆனால், நீங்களும் (மக்களும்) முதல்வராக வரலாம் என்று உணரச் செய்ய பாடுபடுவேன்.

தேர்தலின்போது சராசரியாக 55 சதவீதம் பேர் மட்டுமே வாக்களிக்கின்றனர். இதில் 28 சதவீதம் வாக்குகளை பெறுபவர்களே ஆட்சிப் பொறுப்புக்கு வருகின்றனர்.

எனவே, மீதியுள்ள வாக்காளர்களையும் வாக்களிக்கச் செய்வதன் மூலம் உண்மையான ஜனநாயகத்தை மலரச் செய்ய முடியும்.

காங்கிரஸ், திமுக, அதிமுக உள்ளிட்ட எந்தக் கட்சியை மக்கள் விரும்புகிறார்களோ அந்தக் கட்சிக்கு தங்களது வாக்குரிமையை முழுமையாக பயன்படுத்துவது அவசியம்.

அரசியல் தலைவர்கள் தற்போது கொச்சையாக விமர்சனம் செய்கின்றனர். யார் குடிகாரர் என்று தினமும் வாக்குவாதம் நடப்பது வேதனை அளிக்கிறது.

இளைஞர்கள் நல்லொழுக்கத்தை பின்பற்றினால் பல ஆண்டுகள் இளமையுடன் வாழலாம். எம்.ஜி.ஆர். தனது 65 வயதில் கூட துள்ளிக் குதித்து ஓடியதை நான் பார்த்து வியந்துள்ளேன்.

25 ஆண்டுகள் திரைப்படத் துறையில் தொடர்புள்ள நான் அரசியலுக்கு வர எம்ஜிஆர் தான் காரணம். எம்.ஜி.ஆர். தான் எனக்கு முன்மாதிரி.

“நாட்டாமை” போல யாருக்கும் பஞ்சாயத்து செய்ய மாணவர்கள் நினைக்க வேண்டாம்.

மக்களின் அடிப்படைப் பிரச்சினைகளை தீர்க்க பாடுபடுவேன். அதற்காகவே அரசியலுக்கு வந்துள்ளேன். ஆனால், ஒரு நாள் முதல்வராக இருந்து ஒன்றும் சாதிக்க முடியாது.

2 கட்சிகள் உள்ள ஜனநாயக முறை நமக்குப் பொருந்துமா என்பதை மக்கள்தான் முடிவு செய்ய வேண்டும்.”

நம்ம அண்ணாச்சியின் அறிக்கையினைகண்டு புல்லரித்துப் போய் இருப்பவர்களுக்கு -பொறுங்கள். ஏழரை அண்ணாச்சிக்கா அல்லது தமிழக அப்பாவிஜனங்களுக்கா என்பதை பொறுத்தி்ருந்து பார்ப்போம்.

செய்திகள், தமிழகம் இல் பதிவிடப்பட்டது . 3 Comments »

கலைஞர் கருணாநிதியும் நானும்.

கலைஞர் : பிறந்த நாள் விழா கொண்டாடப்படுவது மகிழ்விப்பதற்காக அல்ல.

நான் : அப்படியா? வேறு எதற்காகவாம்?

கலைஞர் : ஒருவர் கொண்ட கொள்கையை பின்பற்றி நடப்பதற்காகவும் தான்.

நான் : அட இது தெரியாமல் போயிற்றே. இது நமது புது தத்துவமா?

கலைஞர் : நாம் ஏற்கனவே உள்ள தத்துவத்தை முடித்து விட்டு தான் புதிய தத்துவத்திற்குள் நுழைய வேண்டும்.

நான் : அப்படியெனில் புதிய தத்துவம் எப்பொழுது கிடைக்கும்?

கலைஞர் : ஏற்கனவே, உள்ள தத்துவத்தை நிறைவேற்றும் பணிகளை முடியுங்கள். புதிய தத்துவத்தை தருகிறோம்.

நான் : ஏற்கனவே, உள்ள தத்துவத்தை நிறைவேற்ற நாங்கள் என்ன செய்ய வேண்டும்?

கலைஞர் : ஏற்கனவே, உள்ள தத்துவத்தை நிறைவேற்ற, மக்களிடத்தில் நம் கொள்கைகளை இன்னும் ஆழமாக கொண்டு செல்ல வேண்டும்.

நான் : சரி. அப்படியே செய்கிறோம். ஆனால் ஒரு சந்தேகம். நமக்கென அப்படி ஏதாவது தனியாக கொள்கைகள் இருக்கின்றதா என்ன? ஒரு உதாரணம் கூறுங்களேன்.

கலைஞர் : தமிழகத்தில் பிற்படுத்தப்பட்ட மற்றும் மிகவும் பிற்படுத்தப்பட்ட மக்களுக்கு கல்வி மற்றும் வேலைவாய்ப்பில் இடஒதுக்கீடு உருவாக்கிட பாடுபட்டோம்.

நான் : அப்படியா? ஆச்சரியமாக உள்ளது! இந்த வெட்டிவேலையை நாம் எப்பொழுது செய்தோம்?

கலைஞர் : நீதிக்கட்சியாக இருந்த போதும் அதுமாறி பின்னர் திராவிடக் கட்சியாக உருவாகிய போதும் இக்கொள்கைகளை பரவலாக்கி இன்னும் பாடுபட்டுக் கொண்டிருக்கிறோம்.

நான் : (மனதினுள் – அது தான் மத்தியிலும் மாநிலத்திலும் குடும்பத்தினர்களை நுழைக்க அல்லும்பகலும் பாடுபட்டு கொண்டிருப்பது தெரிகிறதே!) ஓ! ஆமாம், ஆமாம். மறந்தே போய் விட்டது!

கலைஞர் : பிறந்தநாள் செய்தியாக நான் மத்திய அரசின் ஆட்சி மொழிகளில் ஒன்றாக தமிழ் வரவேண்டும் என்று கூறியுள்ளேன்.

நான் : பேஷ் பேஷ். ஆஹா! அப்படித்தான் பிரம்மாதம். மத்திய அரசை கதிகலங்க அடித்து விட்டீர்கள் தலைவா!(மனதினுள் – ஆமாம், இப்படியே காலத்தை ஓட்டி விடும். பின்னர் இளைய வாரிசு முன்னெடுத்து செல்லும். அப்படியே இன்னும் ஒரு 100 வருடம் ஓட்டி விடலாம். அடுத்த ஒரு 100 வருடத்திற்கு தமிழன்களை முன்னேற விடுவதாக உத்தேசமே இல்லை போலிருக்கிறது. விளங்கியது போல் தான்.)

கலைஞர் : மேலும், இந்திய நதிகளை ஒன்றிணைக்க வேண்டும்.

நான் : அது நடக்குமா தலைவா?கங்கைகாவிரியில் இணையும் முன் இணைக்க கூறுபவர்கள் இந்தியாவை விற்று விடுவார்களே!( மனதினுள் – ஓ! அவசரப்பட்டு வார்த்தையை விட்டு விட்டேனே. கடவுளே நான் கூறியதை இவர் புரிந்து கொள்ளாமல் இருக்க வேண்டுமே!)

கலைஞர் : கங்கையையும் காவிரியையும் இணைப்பது என்பது கடினம் தான். முதலில் தீபகற்ப நதிகளையாவது ஒன்றிணைக்க வேண்டும். கோதாவரி கங்கை, கோதாவரி காவிரி நதிகளை ஒன்றிணைக்க வேண்டும்.

நான் : (மனதினுள் – அப்படி போடு.நம்மிடமே இப்படி இரட்டைநாக்குடன்பேசுபவர்மக்களிடம் எப்படியெல்லாம் பேசுவார்! யப்பாஆ ஜகஜால கில்லாடி தான் டோய். எப்படியோ நான் சொன்னதை புரிந்து கொள்ளவில்லை. தப்பித்தேன்.) தலைவா, அதுகூட நடக்குமா?(இதுக்காவது ஒழுங்கா ஏதாவது ஐடியா வைத்திருப்பாரா?)

கலைஞர் : மாநிலங்களுக்கு இடையில் உள்ள நதிகளை ஒன்றிணைக்க வேண்டும்.

நான் : (என்ன இது? இப்படி ப்ளேட்டை மாத்தி போடுறார்?) தலையை சொறிந்து கொண்டே… தலைவா, இதாவது நடக்குமா?

கலைஞர் : தென்னக நதிகளையாவது இணைக்க வேண்டும்.

நான் : (யப்போய். தல சுத்துதே!)

கலைஞர் : (என் நிலையை கண்டு கொள்ளாமல் தொடர்கிறார்) இதற்காக மாநாடுகளை போட்டு அதில், மாநில நீர்பாசனத் துறை அமைச்சர்கள் மற்றும் முதல்வர்களை மற்றும் பிரதமரை அழைத்து ஒப்பந்தம் ஏற்படுத்த வேண்டும்.

நான் : (யார் அழைப்பதாம். நடக்காது என்பதை சூசகமாக தெரிவிக்கிறாரோ?) இவ்வளவு கஷ்டப்பட்டு இதெல்லாம் எதற்காக தலைவா?

கலைஞர் : அப்போதுதான் நாட்டின் வளம் பெருகும்.

நான் : (ஆகா! நாட்டின் வளத்தை விட குடும்ப வளத்தை பெருக்குவது தான் தன் உத்தேசம் என்பதை எவ்வளவு தெளிவாக கூறுகிறார்.)

கலைஞர் : எல்லா மாநிலங்களும் பயன் பெறும். அதற்கு ஆவண செய்ய வேண்டும்.

நான் : (யார்? பிரதமரையும் அழைத்து ஒப்பந்தம் போட இவர் யாரிடம் தான் கோரிக்கை வைக்கிறார்? ஒரு மண்ணும் புரியலப்பா.) சூப்பர் தலைவா. நம்மோட பழைய கொள்கைகள்ல மேலும் ஒண்ணு கூட சொல்லுங்களேன்.

கலைஞர் : கொள்கைஅளவில் ஆந்திரா, வங்காளம் மற்றும் தமிழக அரசுகள் மதச்சார்பற்ற அரசுகளாக இருக்க வேண்டும்.

நான் : அது என்ன இந்த மூன்று மாநிலத்தை மட்டும் குறிப்பிட்டு கூறுகின்றீர்கள்? அப்படீன்னா மற்ற மாநிலங்களும், மத்தியிலும் மதசார்புள்ள அரசு அமையலாமா?

கலைஞர் : மத்தியிலும் மாநிலங்களிலும் மதச்சார்பற்ற அரசு அமைய வேண்டும்.

நான் : (வயசாயிட்டாலே இப்படித்தானோ? மனுசன் இப்படி நிமிட நேரத்துல நிறம் மாறுராரே!) அருமை தலைவா!

கலைஞர் : நாம் தான் மதச்சார்பற்ற அரசிற்கு அடிக்கல் நாட்டினோம்.

நான் : (நாட்டல, புடுங்கினீங்க. அண்ணாவின் பகுத்தறிவு பாசறைன்னு அடிக்கடி குரல் குடுத்துட்டு மனுசன் இப்படி கேப்புல மஞ்சத்துண்டு, அடிக்கலுன்னு பினாத்துறாரு. மஞ்சத்துண்டு, அடிக்கல் எல்லாம் மதசார்பின்மையின் அடையாளமோ?) ஆமாம் தலைவா!

கலைஞர் : நம்மால் வளர்க்கப்பட்ட இயக்கம் பெற்றுள்ள வலிமையான இளைஞர் பட்டாளத்தை கொள்கைகளை ஏற்றுக்கொள்ள அடித்தளத்தை ஏற்படுத்த வேண்டும்.

நான் : (அப்பாடா. முதன்முதலா ஒரு உண்மையை போட்டு ஒடச்சிட்டார். ஆமா, கொள்கைன்னா என்னன்னே தெரியாம இருக்குற உடன்பிறப்புகளுக்கு இடையில், இப்படி நிமிட நேரத்தில் மாற்றி மாற்றி பேசிக் கொண்டிருந்தால் எந்த உடன்பிறப்பு தான் கொள்கையை பற்றி கவலைப்படும்?) நம் இளைஞர் பட்டாளம் ஒரு சுத்தமான கொள்கை பட்டாளம் தலைவா. இது கொள்கைக்காகவே ஒன்று கூடிய பட்டாளம் தலைவா! நீங்க சொன்னா எல்லாம் சரியாத்தான் இருக்கும் தலைவா!

கலைஞர்: பழைய தத்துவத்திற்கு புதிய பலத்தை தரவேண்டும்.

நான் : (புரியலியே. ஒருவேளை கம்பு, தடி, அரிவாள்களை விட்டுவிட்டு துப்பாக்கி, குண்டு போன்றவற்றை கையில் எடுக்க வேண்டும் என்கிறாரோ?) கண்டிப்பாக தலைவா! நீங்கள் சொல்லுங்கள். நாங்கள் செய்கின்றோம்.

கலைஞர் : வாய்மை, தூய்மை இரண்டையும் முக்கிய கொள்கையாக நீங்கள் கடைப்பிடிக்க வேண்டும்.

நான் : (ஆமா, கொள்கைகளை கடைபிடிக்க கூறும் பொழுது “நாம்” என அனைத்திற்கும் கூறிவிட்டு, இந்த இடத்தில் மட்டும் கவனமாக “நீங்கள்” என குறிப்பிடுகிறார். பழம் தின்னு கொட்டைப் போட்டவர் என்பது எவ்வளவு சரியானது!) அப்படியே ஆகட்டும் தலைவா!

கலைஞர் : அரசியலில் நாம் ஆற்றும் பணிகளை மற்றும் ஓராண்டு சாதனைகளை மக்களிடம் எடுத்துக் கூற வேண்டும்.

நான் : (கனிமொழியை டெல்லிக்கு அனுப்பியது, மதுரைக்கு தெற்கே அழகிரிக்கும் வடக்கே ஸ்டாலினுக்கும் எழுதிக் கொடுத்துள்ளது, கள்ள ரயில் ஏறி சென்னை வந்தவர் இன்று ஆசியாவிலேயே இரண்டாவது பணக்காரராக ஆனது எப்படி என்பது போன்றவற்றையும் மக்களிடம் எடுத்துக் கூறவா?)இலவச டிவி, அரிசி, வேட்டி, சேலை எல்லாத்தையும் நிச்சயமா எடுத்துச் சொல்றோம் தலைவா.

கலைஞர் : இந்தியாவை வலிமைப்படுத்தும் திட்டமாக சேது சமுத்திர திட்டம் உள்ளது. இந்த திட்டத்தை தடுக்க மதவாத சக்திகள் முயற்சி செய்து வருகின்றன.

நான் : (மதவாத்தின் வரையறை என்ன? குல்லாய் போட்டவர்களின் நண்பன், மஞ்சள் துண்டு, அடிக்கல் இதெல்லாம் மதசார்பின் அடையாளங்கள் இல்லையா?) ஆமாம் தலைவா!

கலைஞர் : ராமர் கோவிலுக்காக பாபர் மசூதியை இடித்தவர்கள், இன்று சேது சமுத்திர திட்டத்தை எதிர்க்கின்றனர்.

நான் : (ஸ்டாலினுக்காக அழகிரியையும், கனிமொழிக்காக தயாநிதியையும், குடும்பத்திற்காக கட்சியையும், ஆட்சிக்காக கொள்கையையும் இடித்து தரைமட்டம் ஆக்கியதை விடவா?) அவர்களுக்கு எதிராக போராடுவோம் தலைவா.

கலைஞர் : இத்திட்டம் நிறுத்தப்படடால் இந்தியாவின் வடபகுதி வாழும்.தென்பகுதி தேயும் நிலை ஏற்படும்.

நான் : (ஓ சங்கதி அப்படிப்போகுதா? சரி அப்படியாவது சிங்கிள் டீக்கு லாட்டரி அடித்து, கள்ள ரயில் ஏறி சென்னை ப்ளாட்பாரத்தில் அலைந்து திரிந்த ஆசியாவின் இரண்டாவது பணக்காரர் தேய்கிறாரான்னு பாக்கலாமே) ஆம். இது தமிழையும் தமிழ்நாட்டை அழிக்க வடமொழியினர் செய்யும் சதி தான் தலைவா.

கலைஞர் : திட்டம் நிறைவேற்றப்பட்டால் தென்பகுதி மிகச் சிறந்த வளர்ச்சி நிலைக்கு மாறும்.

நான் : (அது மாறுகிறதோ என்னமோ, ஆசியாவின் டாப் 10 ல் முதலிடத்திற்கு இவர் மாறிவிடுவார்.) அதன்மூலம் தமிழை உலகெங்கும் பரப்பலாம்.

கலைஞர் : பல நன்மைகளை பெறும்.

நான் : (யார்? புரியுது) எனவே தமிழ் வாழ்க!

கலைஞர் : இத்திட்டத்தை எதிர்க்கும் மதவாத சக்திகளுக்கு பாடம் புகட்ட வேண்டும்.

நான் : எனவே எல்லோரும் உதயசூரியன் சின்னத்தில் வாக்களியுங்கள். (ஆமா வேற என்ன சொல்லப்போறார்? தேவையெனில் அவர்கள் திருந்திவிட்டதாக கூறி கூட்டு வைக்கவும் தயங்கமாட்டாரே. நோக்கம் நாற்காலி மட்டும் தானே. ம் வாழுங்கள். ஆசியா டாப் 10 ஆக வாழ்த்துக்கள்)

கலைஞர் : மத்தியில் மதச்சார்பற்ற அரசு அமைய வேண்டும்.

நான் : (போட்டாரு பாரு போடு. இதுதான் ஹைலைட். எவ்வளவுதெளிவா இப்ப மத்தியில் ஆட்சியில் இருக்கிற காங்கிரஸ் தலைமையிலான கூட்டணி அரசு மதச்சார்பற்ற அரசு இல்லை என்று வாக்குமூலம் தருகிறார். சம்மதிக்க வேண்டும் அய்யா இவரின் தைரியத்தை.) ஆம். அதற்கு நாம் தற்போது போன்று நிபந்தனையற்ற ஆதரவு அளிப்போம்.

புரியாமல் தலையை பிய்ப்பவர்களுக்கு மட்டும்.

சிந்தனைகள் இல் பதிவிடப்பட்டது . Leave a Comment »

இந்தியாவில் தேவதாசி முறை தொடர்கிறது!

இந்தியாவில் பெண்கள் மத ரீதியாக பாலியல் அடிமைகளாக வாழ நிர்ப்பந்திக்கப்படுவது இன்னமும் தொடர்கிறது என்று பிபிசி நடத்திய ஒரு புலனாய்வில் தெரியவந்துள்ளது.

இந்த வழக்கத்தை ஒழிப்பதற்காக சட்டங்கள் கொண்டு வரப்பட்டுள்ள போதிலும், பாரம்பரிய இந்துக் கலாச்சாரத்துடன் தொடர்புடைய இந்த வழமை இன்னமும் தொடரத்தான் செய்கிறது.

எல்லம்மா என்னும் பெண் தெய்வத்தை வழிபடும் முறைமை ஆயிரக்கணக்கான ஆண்டுகளாக அங்கு தொடருகிறது. அந்த பெண் தெய்வத்தை வழிபடுபவர்கள், தமது பெண் குழந்தைகளை அந்த தெய்வத்துக்கு சேவை செய்வதற்காக காணிக்கையாக்குகின்றனர்.

அந்தப் பெண்கள் தேவதாசிகள், அதாவது தெய்வத்தின் அடிமைகள் என்று அழைக்கப்படுவார்கள். ஆனால் தெய்வத்தின் அடிமைகளாக சித்தரிக்கப்படும் இந்த பெண்களில் பலரது வாழ்க்கை ஒட்டுமொத்தத்தில் பாலியல் அடிமைகளாகத்தான் சென்று முடிகிறது.

50 வருடங்களுக்கு முன்னர் இந்த தேவதாசி முறைமையைத் ஒழிக்கும் சட்டம் அமலுக்கு வந்திருக்கின்ற போதிலும், தேவதாசிகளாக பெண்கள் பொட்டுக்கட்டப்படுவது, பாலியல் அடிமைகளாக வாழ்க்கை தொடர்வதும் இன்னமும் தொடரத்தான் செய்கிறது. கர்நாடக மாநிலத்தில் மாத்திரம் சுமார் இருபத்தையாயிரம் தேவதாசிகள் இருப்பதாக இந்த முறைமைக்கு எதிரான செயற்பாட்டாளர்களால் கணிக்கப்பட்டுள்ளது.

படித்தது.

இந்தியா, செய்திகள் இல் பதிவிடப்பட்டது . 2 Comments »

எம்.எல்.ஏக்கள் நீக்கம் – பாஜக அதிரடி.

ராஜஸ்தானில் கட்சிக்கு விரோதமாக செயல்பட்டதாக எம்.எல்.ஏ.க்கள் இருவரை பாரதீய ஜனதா கட்சி இடைநீக்கம் செய்தது.

இதன்படி, ‘அட்டர் சிங் பாந்தா மற்றும் பிரஹலாத் குன்ஜால் ஆகியோர் கட்சியிலிருந்து தற்காலிகமாக நீக்கப்படுவதாகவும், ஒரு வார காலத்தில் அவர்கள் விளக்கம் அளிக்க வேண்டும் எனவும் அக்கட்சியின் செய்தித் தொடர்பாளர் ஷர்மா தெரிவித்தார்.

மேலும், அவ்வாறு விளக்கமளிக்கவில்லை என்றால், அவர்களை நீக்குவது குறித்து தலைமையிடத்தில் பரிந்துரைக்கப்படும் என்றும் அவர் கூறினார்.

குர்ஜார் விவகாரத்தில் மாநில முதல்வர் வசுந்தரா ராஜேவின் மோசமான செயல்பாட்டின் காரணமாக, அடுத்தத் தேர்தலில் கோட்காவில் உள்ள இரு தொகுதிகளில் அவருக்கு எதிராக இவ்விருவரும் செயல்பட திட்டமிட்டிருந்தனர். இதனை காரணம்காட்டி அவ்விருவரும் இடைநீக்கம் செய்யப்பட்டனர்.

மேலும், இந்த விவகாரம் தொடர்பாக மேலும் 20 எம்.எல்.ஏ.க்களுக்கு பாரதீய ஜனதா கட்சி எச்சரிக்கை விடுத்திருக்கின்றது.

இந்தியா, செய்திகள் இல் பதிவிடப்பட்டது . Leave a Comment »